Chinram Ah Ngakchia Covo Kongkau UN Convention Ni An Tuah

Salai Cung Cung |2018 November 20| Ngakchia covo kongkau UN Convention ni cu November 20 suimilam 1:00pm, Bo Thai Chun hall ah an tuah i Chin ramkulh Chief minister Salai Lian Luai nih biatawi chimnak a ngeih tiah kan theih.

“Ngakchia hi tha tein zohkhenh le dawt an herh tuk. Ngandamnak lei, an thluak thatnak lei, an vitamen tibantuk ah zohkhenh zia thiam an hau. Zeicatiah cun hmailei ah cuti ngandamnak tlamtling ah cun ramuktu le hruaitu tha ah a chuak ding lawngte an si. Ngakchia hi ram le miphun caah a biapi tukmi an si” tiah Chin ramkulh Chief minister Salai Lian Luai nih a chim.

Hi tonpumhnak ah hin Chin ramkulh Chief minister le Chin ramkulh UNICEF, ramkulh tuanvo ngeitu zong nih biatawi chimnak a ngei ve. Cu hnu ah cozah tualleng ngakchia le Bethel tualleng nih laamnak le hlasaknak an ngei. Hi tonpumhnak ah hin UNICEF nih Essay zuamnak an tuah i cu zuamnak ah pakhatnak pahnihnak laksawng peknak zong an tuah tiah kan theih.

Hi Essay zuamnak ah laksawng a hmutu hna cu; Nu Rebecca, Pa Henry Sang le Nu Sharon Dar Hnem Tial an si.

Hi Ngakchia Covo kongkau UN Convention ni caanhmannak ah Chin ramkulh Chief minister Salai Lian Luai le Social minister Pu Pau Lun Min Thang, zung riantuantu pawl, INGO, NGO, Khuanu khuapa an i tel kho.