Chinram Ah Rial Tam Taktak A Tla; Rial Le Thli Nih Thantlang Khuachung Inn 5 A Hrawh

Salai Elvis| 2019 February 17| February 17 zanlei suimilam 4 hrawngin Thantlang khuachung cu thli le Rial a fah ngai caah inn 5 a rawk tiah penguk zung in kan theih.

Hi inn a rawkmi cu a di (camphio) a hawhmi deuh an si i inn 5 le inn chungkhar in 7 an umnak a si.

“Tuzanlei inn aa rawkmi hna cu sangthen No.1 ah Pu Ram Peng inn (meithahnak zung hnulei) le lamzung riantuan tu hna umnak inn, sangthen No.2 chungah Pu Ci Thang inn, Pu Zung Kam inn le Saydanar Boarding School kam dawrkhan pathum inn cung hna a hrawh hna. Thialkam ter mi cu an um hraw lo” tiah No.2 khuabawi Pu Val Hlei Thang nih The Chinland Post ah a chim.

Atu bantuk in Thantlang peng khua cheukhat zongah rial tlak a fak ngai i Tlangte khua ah thlalangawngka pakhat zong a kuai. Khuachung inn a hrawhmi hna cu penguk zung, palek, meithat zung le sangchung khuabawi hna nih vehvatnak an ngeih hna tiah kan theih.

Thantlang lawng si loin Hakha peng le Laitlang hmunkip, khuakip ah thli a hrang i atu bantuk in rial fakpi in a tla cio. Ruah zong dinte in a sur chih. Cuti ruah asurmi le thli a hrangmi nihcun khua zong a kihter tuk. Chinram lawng si lo in Mizoram lei zong fakpi in rial a tla ve tiah kan theih.

February 16 zan ah Hakha ah Chin Miphun Ni ca i donhhlei (stage) sakmi le a khamtu vampang zong thli nih a hrawh tiah kan theih.

A cunglei hmanthlak hna hi tu ni ruah, thli le rial a tlami hmanthlak an si.
Photo Credit: Vanram Bawi (Tlangte), Cho Tu (Thantlang penguk zung)

Na ruahning rak langhter ve.. (Leave a comment)

%d bloggers like this: