Chinram Ah Siangsangruun Cachimtu 455 Kan Herh Rih; Minister Pau Lun Min Thang
City Hunter| 2018 June 7| Chin ramkulh pengkip ah siangsangruun cachimtu ding ca lawng ah riankhanh a herhmi saya, sayamah zapi hi 1197 an si. Hi chung ah minung 742 lawng rian an khanh rih hna caah minung 455 riankhanh an herh rihnak kong Chin ramkulh Social Affair ministry zung in kan theih.
Hi kong he pehtlain in Chin ramkulh Social Affair Minister Pau Lun Min Thang cu a zungkhaan ah The Chinland Post nih kan ton i a tanglei bantuk in a chim i cazin a kan pek.
“Atu lio Chin ramkulh ah siangsangruun sianginn kan ngeihmi zat he aa tlak in siangsangruun cachimtu saya, sayamah thazaang hi minung 1197 a herh. Hi a herhmi zat cu 2018 May 31 tiang ah minung 742 lawng rian an khanh khawh rih hna. Siangsangrun cachimtu ding saya, sayamah 455 riankhanh ding an i duh rih. Hihi ramkomh fimcawnnak ministry zung ah kan hal ko hna nain a kan chappiak kho dih rih lo. Riankhanh cangmi siangsangruun cachimtu 742 cu pa 300 le nu 442 an si”.
“Tanghra result a chiatnak a ruang pakhat cu hiti siangcachimtu thazaang (milu) tamtuk an chambau ruang le kan ngeih hna lo ruang ah a si. Kumfatin te siangcachimtu chap pah lengmang an si ko nain sianginn chapmi le level kaitermi sianginn a tam ruang ah siangcachimtu thazaang tamdeuh kan herh chin lengmang ve. Kanmah te in Chinram nih riankhanhnak nawl kan ngeih lomi nih tampi a kan donh” tiah Minister Pau Lun Min Thang nih a biapeh ah a chimchih.
Pengkip hoih in siangsangrun cachimtu ding riankhanh dingmi zat, riankhanh ciami le riankhanh rih lomi cazin cu a tanglei bantuk in a si.
Hakha: Hakha peng in minung 102 riankhanh dingmi chung ah pa 25 le nu 44, an zapi 69 lawng riankhanh rih an si. Riankhanh dingmi 33 an taang rih.
Thantlang: Thantlang peng in minung 124 riankhanh dingmi chung ah pa 30, nu 31, an zapi 61 lawng riankhanh rih an si. Riankhanh dingmi 63 an taang rih.
Falam: Falam peng in minung 177 riankhanh dingmi chung ah pa 32, nu 73, an zapi 105 lawng riankhanh rih an si. Riankhanh dingmi 72 an taang rih.
Tedim: Tedim peng in minung 198 riankhanh dingmi chung ah pa 44, nu 95, a zapi 139 lawng riankhanh rih an si. Riankhanh dingmi 59 an taang rih.
Tonzang: Tonzang peng in minung 95 riankhanh dingmi chung ah pa 27, nu 25, a zapi 52 lawng riankhanh rih an si. Riankhanh rih lomi 43 an taang rih.
Mindat: Mindat peng in minung 110 riankhanh dingmi chung ah pa 27, nu 53, a zapi 80 lawng riankhanh rih an si. Riankhanh rih lomi 30 an taang rih.
Matupi: Matupi peng in minung 137 riankhanh dingmi chung ah pa 53, nu 45, a zapi 98 lawng riankhanh rih an si. Riankhanh rih lomi 39 an taang rih.
Kanpetlet: Kanpetlet peng in minung 93 riankhanh dingmi chung ah pa 19, nu 24, a zapi 43 lawng riankhanh rih an si. Riankhanh rih lomi 50 an taang rih.
Paletwa: Paletwa peng in minung 161 riankhanh dingmi chung ah pa 43, nu 52, a zapi 95 lawng riankhanh rih an si. Riankhanh rih lomi 66 an taang rih.
Sianglairun le siangniamrun cachimtu hi 2016-17 kum cazin ning in cun Chin ramkulh ah siangniamrun cachimtu 2163 le sianglairun cachimtu 1443 riankhanh an herh tiah an langhter. Hi chung ah riankhanh cangmi zong an um bang bantuk in tukum chung ah riankhanh colh dingmi an um caah tharchuahmi cazin langhter an duh rih lo. Buaktlak in cun 2018 kum Chin ramkulh ah siangsangrun cachimtu, sianglairun cachimtu le siangniamrun cachimtu ding riankhanh a haumi le riankhanh rihlomi zapi hi a tlawmbik 3000 renglo an si lai tiah Chin ramkulh siangcachimtu thazaang dirhmun le cazin in kan theih. +++
About The Author
