Chinram Ah Thilchuak A Um Lo Caah Kawlrawn A Zuangmi Motor Nih Zuu Palaang Lawng An Phurh
Salai Elvis| 2018 November 20| Chinram chungah thil a chuah lo tikah Kawlrawn in Chinram ah a rak kaimi thilphur motor hna nih Kawlrawn lei an zuan than tikah va zuar chin awk thilri zeihmanh phurh ding a um lo, zuu palaang a lawngmi lawng an phurh tiah Chief Minister Salai Lian Luai nih a chim.
November 19, Hakha Town Hall ah tuahmi Chin ramkulh cozah kumhnih chung an riantuan mi chimfiannak ah a tubantuk in a chim hi a si.
“Chin ramkulh Paletwa ah ton 300 a phur khomi tilawng dinhnak tuah a si lai. Chinram chung chak le thlang pehtlaihnak lam a that in cun Chinram chungah ah a chuakmi paoh motor in Paletwa lei ah phurh i ramleng lei zongah zuar khawhnak lam kan tawlrel lio pi a si. Hi rian kan tlamtlinh ah cun Chinram chung in a chuakmi thilri paoh motor, vanlawng le tilawng in phurh le kuat khawhnak ding lam a rauhhlan ah ngah dingin kan tawlrel cuahmah. A tlamtlin in cun kan ram in a chuakmi pangpar, hangthei/hnah hna cu ramleng ah zuar khawhnak lam a um lai i ramchung Mandalay, Yangon zongah man tha ngai in kan zuar khawh te lai” tiah a chim.
“India ram zong motor in kuat le phurh khawh a si cang lai. A tu lio India-Myanmar pehtlaihnak innka hmun nga ah hun a si cang lai. Cucaah, Chin ramkulh cozah zong nih a hlankan in zeidah kan cin lai i kan chuahter khawh lai timi timhlamh cia kan hau. Cu lo ah cun pehtlaihnak lam vial that ngai tung i vanlawng, motor le tilawng hna in phurh awk thil a um lo sual lai. A tu lio Kawlrawn in Laitlang a rak kaimi, Kawlrawn an zuan than tikah thilri phurh awk zeihmanh a um lo, zuu palaang lawng phurh awk a um” tiah a biapeh ah a chimchih.
Chin ramkulh cozah nih kumhnih chung an riantuanmi cu mizapi sinah chimfiannak an tuah ni ah CM Salai Lian Luai nih a bik in Surbung tlang vanlawng rawn 100 ah 48% an lim cang i 2020 kum ah Vawnlawng a tum khawh cang lainak kong. Paletwa ramchung Kaladan hlei pe 500 sau in an donhmi kong fianternak, ti tha tein kan hmuh hnu lawng ah Hotel tha a um lainak kong le a dangdang kumhnih chung an riantuan ciami kong le hmailei an saduhthahnak kong tampi a chim. +++
