Chinram Ah Tlang Sang Bik Khonumtung Tupi Hual Ah Zeidah A Chuak?

0

Salai Holy Tawk Tling Thang| 2018 March 5| Chin ramkulh ah tlang sang bik le Kawlram chung ah tlangsang bik changtu Victoria tlang (Khonumtung) tupi hual cu khuazei ah dah a um? Hi tupi hual asiloah miphun dum ah thingkung, ramkung, va phun, thingkep par, saram tibantuk zei pawl dah an um? Na hngal ve cang maw, hun zoh ti hna usih.

Umnak Hmun

Khonumtung Tupi Hual (Mount Victoria National Park) cu Chin ramkulh Mindat, Kanpetlet le Matupi peng chung ah a um. Khonumtung tupi hual chung ah Mount Victoria tlang a um. Victoria tlang hi Chin ramkulh ah tlang sang bik a si. Cun Kawlram chung zong ah tlang sang bik chang a si. Kawlram chung ah tlangsang bik cu Khakaborazi tlang a si.

Khonumtung tupi hual

Khonumtung Tupi Hual Dum A Bitkauh
Khoumtung Tupi Hual Dum chung ah Victoria tlang a um. Victoria tlang cu vawlei khuhmi (ေျမသား ဖံုးလႊမ္းမႈ အမ်ိဳးအစား) phun ah ASEAN chung ah a sang bikmi a si i Kawlram ah a sang bik pahnihnak tlang a si. Rili in pe 10,500 a sang. Rampi cozah nih National Park (Ecotourism) tiah 2010 December 2 ah a fehter. Khonumtung Tupi Hual Dum cu ekah 176,300 a kau i Kanpetlet, Mindat le Matupi pengthum fonh in ser a si. Kanpetlet peng ah ekah 29,530, Mindat peng ah ekah 13,3970 le Matupi peng ah ekah 12,800 a um. (Bawipatu Tupi Hual khi ekah 30,720 a kau)

Khonumtung Tupi Hual Dum Ah A Ummi Thilnung
Tupi a umning phun hi tlangcung hringdildel tupi, tlangcung farthing tupi le tlangcung hramhbelh tupi tiah phunthum a um. Hi bantuk aa khat lomi fonhmi tupi a sinak nih kokek a hrampi khualtlawnnak (Ecotourism) caah duh a nunnak, mit a hlannak le a that khunnak pakhat a si. Thingkung hi phun 2,500 ringlo a um. Cun kokek in a chuakmi Chokhlei Par zong arang, asen le aihre (eng) tiah phunthum a um. Ramkip dirhmun tluk in a sangmi sii-ai ser ding phun 100 ringlo a um. Thingkep par hi phun 200 ringlo a um. Hnukding saram phun 43, va phun 345, a lawn in a lawnmi saram 105, palep phun 77, a cuar a hakmi rungrul phun 35, sawmpalak phun 94 an um.

Natmah Qaung Maw Khonumthung Dah?

Khonumtung tlang cu a hlan ah Natmah Qaung tiah auh a si tawn nain Chin ramkulh hluttaw nih kokek min in auh siseh tiah bia an chah caah Khonumtung asiloah Khonumsung tiah auh ding in an fehter cang.

Cucaah, Chinram nih kan ngeihmi thil mansung hna hi kanmah Chin miphun nih hlawknak le thathnemnak kan ingeih khawh chung hlan poah cu kilven le humhak a biapi tuk. A cunglei langhtermi thilchuak pin ah hmuh khawh rih lomi, theih rih lomi thil chuak phun tampi a um kho rih.
Ch: TCP: Vol.2, No.70/ Chin ramkulh thingram zung cazin

About The Author

Na ruahning rak langhter ve.. (Leave a comment)

%d bloggers like this: