Chinram Aiawh In Ka-yah Balah Mee I Zuam Le Gym Celh Ka Zuambik; Sarah

Salai Cung Cung|2019 May 17| Avoi 1nak Global Zophei Seminar miss zuamnak ah Leitak Zipi in Mai Sarah nih 2nd runner up a ngah. Miss zuamnak nakin ka-yah –ba-lah mee zuamnak hi ka duh deuh mi le ka huam deuh mi a si tiah Sarah nih a chim.

“Miss zuamnak ah cun kaa zuam bal lo, tutan Zophei Miss zuamnak hi ka voikhatnak a si. Kei hi Miss lei hi ka zuamphun tuk cu a si lo, kan Zophei nih Miss zuamnak an tuah caah kaa zuam ve mi asi. Kei cu Miss lei nakin Ka-Yah-Ba-lah mee lei zuamnak lai hi ka zuam deuh phun a si. Cucaah exercise le GYM zong kaa celh pengnak hi a si” tiah Sarah nih The Chinland Post ah a chim.

“Miss zuamnak ah cun kaa zuam bal lo nain nikum ah Chin ramkulh ai-awh in 2018 November Yangon ah Ka-Yah-Ba-Lah mee ka rak i zuam bal. Miss lei in ka cawlhcanghnak cu CPC Paih avoi 2nak ah round girl ka tuan, Zophei Seminar program kong ah fakthanhtu ka tuan, kum fatin Chin rambawi don le laam ah kaa tel peng, cun photo fashion pawl zong kaa thlak pah, a dang cu zeiti ngai in tuahmi ka ngei rih lo” tiah a chim chap.

“Ka zuambik mi le kaa tinhmi cu GYM celh le Chin ramkulh ai-aw in Ka-Yah-Ba-Lah Mee zuam hi a si. Tu lio cu zei hmanh tuanmi ka ngei rih lo. Ka sianginn kai ka dih rih lo caah inn rian herh mi tete tu ka tuan lio a si. Miss lei in cawnnak le chimtu ka ngei lo. Kei hi biachim holhrel ka thiam tuk lo caah movie lei tibantuk le holh le rel in fakthanh hau mi pawl a kan fial ah cun i rauh ngai ka hau. Photo miss le a dang dang ah cun kan Laimi le kan Miphun caah ka si khawh tawk in kaa zuam peng rih ko lai” tiah Mai Sarah nih a chim.

“Miss aa zuam dingmi nih a herh ngai tiah ka ruahmi cu, biatak tein kan pumsan aa dawhnak ding ah GYM celh peng le exercise tuah a hau. Cun Fimthiamnak lei le dang dang, muidawhnak pakhat pi lawng in cun a za lo. Hmailei kaa timh le ka duhmi cu Chin ramkulh ai-awh in Ka-Yah-Ba-lah mee i zuam in kawlram pumpi tiang theihmi dirhmun tiang si ka duh i tu zong kaa zuam lio pi a si”.

Sarah hi Thantlang peng Leitak Zipi a si i unau 3 lakah a hniang bik a si. A nu Pi Khua Iang, apa Pu Mang Cung an si. Tu lio sianginn kai liomi cu History Distance kumkhatnak, Hakha GTI ah kumhnihnak tiang a kai. Atungkhan pe 5 le letmah 4 a si. A zuambik mi cu exercise le GYM tuah hi a si tiah kan theih.+++

Na ruahning rak langhter ve.. (Leave a comment)

%d bloggers like this: