Chinram Kulh Paletwa Peng Sami Ah CCPR Nih Ralzaam Pawl Inn le Herhbau A Bawmh Hna

0

CCPR nih Innsakpiakmi/CCPR

Salai David Van| TCP-Hakha | 2020 Deccember 10| Chinram Kulh Paletwa  Peng Sami ah Chin Center For Peace & Reconciliation(CCPR) nih ralzaam pawl umnak inn an sak piak hna tiah kan theih.

Hi kong he pehtlai in Chin Center for Peace & Reconciliation (CCPR) in Project Manager Salai Peter Thiam Bawm Sang nih “Atu kan Project hi Zawnruahnak(Sana) Project kan ti i a kan bawmtu (Donor) hi Norwegian Refugee Council (NRC) an si. Hi project hi Shelter le eidin aa tellomi (Non Food Item_NFI) tiah phunhnih in kan then. Shelter hi Inn sak lei kong si i  150 sak piak dingin NRC he hnatlaknak kan ngei nain Inn 50 lawng kan sak khawh rih. A tangmi Inn 100 zong hi January 30 hlan ah dih ding a si i a tu hi kan van thok than cang. NFI tu hi  cu Hnipuan, Pher, Saipiat tbk pawl phun(18) hrawng si i a luancia Agust thla ah khan kan phawtzamh dih cang hna tiah” TCP ah a chim.

” Inn cu a herhmi kan cawkpiak hna i anmah tein an isak. Hi bawmhchanhnak hi July thla hrawng khan kan thok i kalumnak ah harnak kan tong ngai. Asinain Cozah lei zong nih nan project hi thiltha pei a si cu tiah zalong tein aa kan cohlan pin ah  bawmchantu an tam pi ve hna caah zei dang dang lei in harsatnak kan tong hraw lo” tiah a chim chap.

Chin Center for Peace & Reconciliation (CCPR) cu 2016 kum ah Chinram daihnak, thanchonak le hartongmi hna bawmhnak ca muitinh in an rak dirhmi a si. Yangon le Hakha ah zung ngei in a cawlcang cuahmahmi an si tiah kan theih.

About The Author

Na ruahning rak langhter ve.. (Leave a comment)

%d bloggers like this: