Chinram Paletwa Peng Khuate 200 Leng Ei Awk Facang An Ngei Ti Lo

Paletwa IDPs/RRCCI

Salai Bawi Lian Sang|TCP-Kalay| 2020 October 3|Covid pulrai le raldohnak ruangah umkalnak kham a si mi Chinram kulh Paletwa peng ah facang an har ngai tiah Chin ramkulh cozah bia chimnak nawlngei tu Sinpi Minister U Soe Htet nih October 2, 2020 ah a chim.

“Rakhine hriamtlai AA le kawlralkap ruangah harnak a tong mi Paletwa peng ah pulrai ruangah umkal kham a si tik ah khuate 200 facang harnak an ton. Paletwa peng chung facang kuat dingmi tun 6000  ram hunhimnak ruangah ah lam khar a si tik ah Sittwe le Kyuakdaw khua ah kum cheu tluk aa tap ko. Kaladan tiva kam ummi 60,000 hna cu Kaladan Tilam  khar dih a si caah cun ei din awk an harnak a si’ tiah U Soe Htet nih a chim.

Raldoh nak ruang ah rian zong tuan ngam a si ti lo. Paletwa peng nih eidin thilri cawknak ah an kal tonnak Rakhine ramkulh Kyuakdaw peng he umkalnak phih a si.

Atulio Paletwa peng chung kahdohnak ruang Rakhine, Kyuakdaw lei kalnak Kaladan Tilam an khar hi February 2020 in a si cang. Cucaah, lam dang hman tawnmi Paletwa, Sami in Matupi lei kalnak tlang lampi zong an khar chung caah eidin harsa ngai in an um i thilman a fak ngai tiah theih a si.

Facang a um ti lonak khua te hna hi Kaladan tive a hnu lei le Paletwa peng a cung lei ni chuak khua pawl an tam. Paletwa peng ah khuate 389 le milu 108,000 ah khuate a cheu tluk facang ei awk an  ngei ti lo. Chin ralzam bawmhnak tuah tubu (RRCCI) in biachimnak nawl ngei Mai Nang Wai zong nih facang a ngei ti lo mi hi khua te 250 tluk an si lai a ti.

“Raldohnak ruangah facang a ngei ti lo mi khua mi nih Paletwa khua tiang fa cang cawk an kal ngam ti lo. Tilawng in a kal mi zong meithal in kah an ton. Khua zei bu nih  an kan kap ti kan thei hna lo. Cucaah a hohmanh an kal ngam ti lo” tiah Mai Nang Wai nih  a chim.

“Bawmhnak in a chuah mi facang cheukhat Sami khua ah a um na tein ral tih ruagah Paletwa tiang an phor ngam ti lo. Paletwa ah facang man a kai lio ah Magwe ramthen ah kyat 40,000 man facang cu Paletwa ah kyat 70,000 man a si. Arti pumkhat ah kyat 500 in cawk a si” tiah Paletwa khuami Ko Aih Tun Min nih a chim.

“Paletwa pengchung um Paletwa ralzam comp, Sami ralzam camp, Seihsinwah ralzam camp le Miza ralzam camp ah mi 10,000 hlei sin ah  bawmhnak an rak pek mi a um ko rih caah a ning deuh” tiah U Soe Htet nih a chim.

2020 kum raldoh nak a um ruang ah pengchung mi ralzam 10,000 hlei le harsatnak tonmi 80,000 hrawng a um tiah RRCCI a hnu bik data in theih a si. Myanmar Now

Na ruahning rak langhter ve.. (Leave a comment)

%d bloggers like this: