Chinram Pengkip Budget Chiahpiak Ning Kong A Dik Lo Tiah U Nay Lin Aung Nih Biahalnak A Ngeih

Salai CungCung|2019 May 23| Chin ramkulh pengkip budget an chiah mi a dikfel lo, pengkip ah Budget an chiahmi cu zeibantuk zoh in dah tangka an suaisam timi theih ka duh tiah Mindat in Pyithu Hluttaw palai U Nay Lin Aung nih May 21 Pyithu Hluttaw tonpumhnak ah biahalnak a ngeih hna tiah kan theih.

“Keimah nih ka halmi hna cu Budget an suaisam ning hi i tluk tein um hna seh ti ka duh caah a si. A luancia Budget cu an suaisam dih cang, cun tawlrelnak zong an ngeih cang caah vun remh than ding cu a si thiam ti lo. A ra laimi tangka kum tu ah cun pehzulh in Budget an suaisam tik ah i tluk te le i khat cio tein tuah hna seh ti ka duh caah ka hal mi hna hi a si. Chin ramkulh ai-awh in bialehnak a tuahtu minister nih cun kan chimhpiak hna lai a ti caah hmailei ah cun i tluk tein le i khat tein a si te ko men lai ti ruahchannak ka ngei. Cun ramkulh Budget a tlak tikah ramkulh hluttaw biachahnak in tuahmi a si caah ramkulh hluttaw palai zong nih Budget an suaisam tikah tha tein chekfel hnu ah i tlukrual tein biachahnak ngeih hna seh ti ka duh”.

Hika ah biahalnak le bialehnak an i tuah lio video zoh  khawh a si.

 

Pyithu hluttaw palai U Nay Lin Aung bia hal ning ah  2016-2917 tangkum, 2017-2018 tangka kum le 2018-2020 tangka kum ah Budget an suaisam mi cu Hakha peng, Thangtlang peng, Falam peng le Matupi peng ah Budget suaisam mi a tambik an si tiah kan theih.

2016-2017 tangka kum ah Hakha cu Tangka Kyat 34 Billion hrawng tiang an hmuh i Kanpetlet le Tonzang ah cun 4 Billion hrawng lawng an hmuh caah Budget hmuh ning ah a let 8 in aa dang, cun Thantlang ah Budget hmuhmi cu pengkomh khuapi a simi Mindat leng in a let 3 in a tam, pengkomh khuapi a si mi Falam pengkomh cu Mindat pengkomh nakin a let 2 in a tam, Hakha le Mindat pengkomh hmuh ning tuak tikah Hakha Budget hmuhmi hi a let 5 in a tam tiah U Nay Lin Aung nih a chim.

U Nay Lin Aung biahalmi cung ah Chin ramkulh cozah ai-awh in Simanking le tangka lei minister U Mg Mg nih Chin ramkulh tangka Budget hmuhnak le hmannak cu pengkip khuakip ah phawtzamh tikah mipi hna an herhmi kha a bik in kan zoh i tangka cu an herh ning, thanchonak papek in ramkulh cozah nih an then hna i ramkulh hluttaw ah an chuahpi hnu hnatlaknak ngeih hnu ah kan tawlrel hi a si tiah bialehnak a tuah.

Chin ramkulh cozah nih Budget an suaisam mi cung ah Minister umnak le minister um lonak tangka Budget hmuh ning aa dang ngai tiah Chin ramkulh hluttaw palai cheukhat nih soiselnak le ceihmainak an ngei tiah kan theih.

Ref: Chin World

Na ruahning rak langhter ve.. (Leave a comment)

%d bloggers like this: