Chinram Tangka Hram Bunh Duhtu Paoh Ngunkhuai Kum 7 Awlh Le Vawlei Ngeihnak Pek A Si Lai
TCP-Kalay| 2018 December 4| Chin ramkulh ah tangka hram bunhnak (investment) riantuan a duhtu hna cu vawlei ngeihnak nawl Chinram cozah nih pek a si lai caah aa leet thanmi tangka hram bunh a duhtu hna paoh nan rak lut kho than tiah Chin ramkulh chimnak nawlngeitu Sipin Minister U Soe Htet nih a chim.
Cu hlan ah Chin ramkulh chung tangka hram bunh a duhmi rianngeitu hna cu ngunkhuai kum 7 awlh (luatter) an si nain vawlei hmun ngeihnak pek lo in caansau vawlei hlanhnak cahran (sachoh) in sawm an si ruang ah chawphum a duhmi rian ngeitu tampi nih aa tlak lo an ti i hnu an i leet than lengmang.
Sipin Minister U Soe Htet nih, “Kanmah nih vawlei hmun zong kan pek hna lai. Ngunkhuai man zong kan thumhpiak hna lai caah aa leet thanmi company 40/50 hrawng atu an rak lut than cang. Ahlankan hi kong tawlrelnak ning aa pialkaan, dinhdorhpiaknak a um lo. Atu cu kan dinhdorh cang hna. Ngunkhuai awlhnak (luatternak) pawl tuahpiak lo ahcun zeibantuk chawphumnak hmanh Chinram ah an lut in an tuah lai lo” tiah a chim.
“Cheukhat cu hotel a sami zong an um cang. Anmah minte in kan tuahpiak hna caah Hakha, Thantlang ah hotel sak an thawk cang. Ka sa than lai lo tiah aa leetmi hna zong vawlei hmun hi anmah min te in pekding a si caah a kan pehtlaih thanmi an um. Kanmah Chinram ahhin hotel pakhat sak ahcun sing thonghra, sing thongkul, sing thongsawmthum tibantuk chawva phum a hau. Anmah min te in vawlei ngeihnak nawl an ngah lo cun zeitindah an chawva an phum duh lai. Ngunkhuai awlhnak zong kan pek hna awk a si, cu lawnglawng ah tualchung mizapi caah rian hmuhnak zong a si lai” tiah a chimchih.
Dr. Sui Hingz zong nih, “Chin ramkulh hi hiti zoh tikah a kau nain vawlei area i zatuak 35% hi thingram zung area ah chiah a si. Thingram zung area hi a kau tuk nain thingram zung in a lutmi tangka hi kumkhat ah ks. 1500million hrawng lawng a si. Thingram zung in hmuhmi tangka le vawlei hmun bit/kauh hi aa tlak lo. Cu ruang ah thingram area hi zaangraam lo in sethmuh zone hmunhma ah ser awk an si. A biapimi cu pengkip ah vawlei hmunhma rikhiah i anmah he aa pehtlaimi sethmuh le kutzung rian tibantuk pawl an tuahtuan khawhnak ding sersiampiak a herh. Acozah nih budget pawl hi lam rian le a hrampi inn (building) saknak lawng ah hmang lo in a fami sehlei le kutzung lei riantuan khawhnak ding cozah nih vawlei hmun le SME chawkarh pawl Felfaite in a tuah ahcun a fami in a laivuang rian pawl, cun a nganmi sethmuh zone tiang a thangcho kho lai” tiah Chin World he biaruahnak ah a chim.
A biapi in chawphumnak rian caah hotel le khualtlawnnak rian he pehtlai in compan paruk, hydro electric he pehtlai in company 4/5 hrawng a rak soktu an um cang tiah Sipin minister nih a chim.
Ref: Chin World
About The Author
