Chinram Zaanglekcelh Zung Bawmhnak In Avoi 2nak Hakha Town Churches Pumpululh Chuih Zuamnak An Tuah Lai

nikum ah bukip fonh ah champion a cotu Free Methodist

Salai Cung| 2018 April 25| Avoi 2nak Hakha Town Churches pumpululh chuih zuamnak cu Chin ramkulh zaanglekcelhnak zung bawmhnak (sponsor) in May thla chung ah an tuah lai. Khrihfabu bu pakhat ah ks. singkhat (ks. 100,000) cio bawmhnak pek an si lai tiah kan theih.

“Avoi 2nak Hakha Town Churches pumpululh chuih zuamnak cu May thla chung ah tuah a si lai i pumpululh chuih zuamnak ah a chuakmi Khrihfabu bu pakhat ah ks. singkhat (ks. 100,000) bawmhnak pek an si lai. Hi pumpululh chuih zuamnak nih aa tinhmi cu kan Hakha peng chung in bukip i hawikomhnak thanchoter le kan mino hna pumpululh chuih thiam tampi chuak hna seh ti kan duh caah a si. Tutan zuamnak tuah hlan ah bualtlaitu (referee) hi kan um lo caah zarhkhat chung bualltaitu asiloah bual rikhiaktu training peknak kan tuah hmasa lai. Cun, cu training pekmi hna cu Hakha Town Churches lentecelhnak tuahtik tuanvo latu ah kan hman beh hna lai” tiah Zaanglekcelhnak zung in tuanvo ngeitu Pu Jacob nih The Chinland Post ah a chim.

Tukum, avoi 2nak Hakha Town Churches pumpululh chuih zuamnak cu Chin ramkulh Zaanglekcelhnak zung tawlrelnak in an tuah lai. Hi tuahnak caah ks. sing 40 hrawng dih ding in timhlamh a si. Avoi 1nak cu Chin ramkulh Sipin le Electric minister Salai Isaac Khen nih ks. sing 29 hlutmi in an rak tuah. Tukum zuamnak ah pakhatnak laksawng hi ks. sing 5 (500,000) le pahnihnak hi ks. sing 3 (300,000) a si lai i pathumnak laksawng pek a um lai lo tiah tiah kan theih.

“Avoi 1nak Hakha Town Churches pumpululh chuih zuamnak cu Hakha Free Methodist nih champion laksawng le Zion Baptist Church nih pahnihnak laksawng an rak laak. Nikum ah a rak chuih khomi phu 21 an si, tukum cu mah nakin an tam deuh lai ti ruahchannak kan ngei. Chuncung le Hniarlawn zong kan sawm hna. Cun UPC zong phu hnih in an chuih lai caah nikum nakin kan tam deuh ko lai” tiah Pu Jacob nih a biapeh ah a chimchih.

Hi Town Churches pumpululh chuih zuamnak cu Hakha ummi bukip khrifabu Pastor te dihlak tonpumhnak an ngeih dih hnu ah ram thanchonak ca, khrihfabu bukhat le bukhat i hawikomhnak, mino pawl pumpululh chuih an thiam deuhnak ding hmuitinh le ruahchannak he tuah an timh hi a si.

Na ruahning rak langhter ve.. (Leave a comment)

%d bloggers like this: