Chin’s Got Talent Season 3 Le CND Kong Cabia Tial Zuamnak An Tuah Lai
TCP-Hakha| 2019 January 23| US ram, Indianapolis ah Chin’s Got Talent Season 3 zuamnak, CND (Chin National Day) kong catial le biachim (speech) zuamnak an tuah lai. Chin’ Got Talent Season 3 winner laksawng cu $3,000 le cabia tial le biachim zuam pakhatnak cu $600 a si lai tiah kan theih.
Chin’s Got Talent Season 3 zuamnak cu aralaimi February 1-2, Chin Centre ah aw hneksaknak (audition) an tuah lai. Hi zuamnak caah atu in min cazin pek khawh a si i January 31 tiang lawng min cazin peknak caan an onh. Zuamnak ah tel a duhmi paoh nih Chin Community of Indiana (CCI) facebook messenger le (317 985-1379 ah chawnh le cakuat khawh an si.
Indianapolis khuachung ummi lawng si lo in US ramchung hmun zakip in zuamnak ah i tel chih khawh a si. Chin’s Got Talent Season 3 i pakhatnak laksawng cu $3,000, pahnihnak laksawng $1,000 le pathumnak laksawng $500 an si lai. Chin’s Got Talent Season 3 ah a thiambik 3 (top 3) chung in winner cu Chin National Day i second program zaan ah thanh a si te lai. Chin’s Got Talent cu Chin Community Of Indiana (CCI) nih a tawlrelmi le a sponsor mi a si. Chin’s Got Talent Season 2 pakhatnak laksawng cu Honey Khuaitizuu nih a rak co tiah kan theih.
Cabia le biachim zuam dingmi tlangtar cu Chin Miphun Ni (Chin National Day) kong a si lai. I zuam ding in min caan cu January 25 thawk in February 8 tiang a si lai. I zuam caan hi February 8-9 ah a si lai. Pakhatnak laksawng cu $600.00 (Roca), pahnihnak cu; $400.00 le pathumnak cu $200.00 a si lai.
Hiti zuamnak an tuahhnawhmi cu; Chin mino hna nih an ngeihmi pahrang hi i thutpi sawhsawh lo in ramdang dirhmun phan ding in cawisan an duh ruang le catial thiam tampi an chuah i ramkhel sining an thinlung i a luh deuhnak ding le biachim an thiam chinchinnak ding hmuitinh he a si tiah kan theih.
Cabia tial le biachim zuamnak he aa pehtlaimi zulhphung le hngalh ding mi hna cu a tanglei bantuk in an si.
- Laica in ṭial a si lai. Regular paper 8.5”x11” in Cahmai hmai 2 nak tam loin ṭial a si lai. Times New Roman font, size 12 hman a si lai. Na tial mi capar cu 10 minutes chungah tling tein chim a si lai.
- Capar kuat tik ah Microsoft Word le PDF hmang in (cnd2019@indychins.org) ah na email ID le na phone number telhchih in na kuat lai.
- Hi capar le CND speech zuamnak ah capar in siseh, biachimnak in siseh tel than lo ding in le cabia thlen na duh ahcun na kuat hnu ni (3) hlan ah theihternak na tuah zau lai.
- Capar kuat/cohlan chung cu Jan 15, 2019 in Feb 08, 2019 kar a si lai.
- Hi zuamnak ah kum 18 in 30 kar Mino lawng tel khawh a si lai.
Hngalh ding:
- Zuamnak ah Pakhatnak ngahtu nih CND ni ah CND tuanbia kong a capar cu tawifiangtling tein minit 10 chung ah chim khawh aa zuam lai. A capar le Video clip cu CCI Website ah tarpiak asi lai.
- Pahnihnak le pathumnak a ngahtu hna an capar zong CCI Website ah tarpiak an si lai.
- Laksawng cu a tanglei bantuk in pek an si lai.
1) 1 st Prize – $600.00( Roca)
2) 2 nd Prize – $400.00
3) 3 rd Prize – $200.00
- Zulhphung ning lo in ṭial, kuat mi capar cu check le zohpiak a si lai lo.
- Hi capar zuamnak ah na kuat mi capar copy rights cu CCI nih aa ngeih lai
Hmakpetu hna zulhphung.
- Hi Capar tial zuamnak le CND speech zuamnak cu hmak petu hna nih a kap hnih in zoh le check piak a si lai.
- Duhdanh ngei lo te in thimnak tuah a si lai.
- Hmak cu a tlawm bik 10 in a tam bik 100 tiang pek khawh a si lai.
Ref: ICC (Chin Community of Indiana)
About The Author
