CHRO Le Dean Smith Nih Chin Ralzaam Kong Ah Malaysia I UNHCR Le Australia High Commission An Ton Lai

Tawk Tling Thang | 2019 February 16|  Australia Parliament pakhat a simi Senator Dean Smith, CHRO (Chin Human Rights Organization) upa le ACF (Australia Chin Federation) upa hna nih Chin ralzaam kong ah Malaysia i UNHCR zungpi le Australia High Commission an ton lai tiah kan theih.

Hi kong he pehtlai in ACF Vice Chairman Pu Renny Ceu Lian Mang nih, “Senator Dean Smith tawlrelnak in amah le CHRO upa hna le ACF upa ti in Chin ralzaam kong ah a ralaimi February 27, Malaysia ah kal in Malaysia i UNHCR zung le Malaysia i Australia High Commission upa ton biaruahnak kan ngeih hna lai. Senator Dean Smith cu American Baptist Churches pawl nih bawmhnak an hal i camping tuah ding in ca zong an kuat cang” tiah The Chinland Post ah a chim.

Australia Prime Minister Scott Morrison le Australia Chin upa le CHRO Riantuantu hna

Hi kong he pehtlai in CHRO in Program Director, Nuhrin Covo Fimcawnnak le Biaknak Zalonnak (Human Rights Education and Freedom of Religion or Belief) a simi Salai Sang Hnin Lian nih, “February 27 ahkhin kanmah CHRO le Australia lei in a ra dingmi upa hna he Malaysia i Chin ralzaam upa ton biaruahnak kan ngeih hmasa hna lai. Cun, February 28 le March 1 ahkhin Malaysia i UNHCR zung upa le Australia High Commission upa he ton biaruahnak kan ngei lai” tiah The Chinland Post ah a chim.

 

2018 January thla lio ah Chin ramkulh, Thantlang peng, Tikir khua tiang amah pumpak hrimhrim in a rak tlawngmi Australia Parliament in Senator Dean Smith nih February 13 ah tuahmi Australia Parliament ah Chin miphun le Chin ralzaam kong a kan chimphuan piak hnu ah atu bantuk in Malaysia ah kal than an i timh hi a si.

Australia Chin Zatlang Bu (Australia Chin Federation-ACF) hruainak in 2018 December 3-4 ah Australia rampi Uktu Bawi Prime Minister, Minister a dangdang le cozah riantuantu, MPs le ramleng pehtliahnak tuanvo ngeitu hna cu Chin miphun ralzam kong le Chin miphun kong ah Chin Human Rights Organization (CHRO) riantuantu upa hna he tonbiaruahnak an ngei.

Hi lio cu Senator Dean Smith tawlrelnak in CHRO nih a voihnihnak cozah an ton a si. Kan hnu 2017 September ah CHRO in Salai Bawi Lian Mang le Salai Za Uk Ling nih Australia cozah tonnak voikhat an rak ngei bal cang. Atutan hi a hleikhun in hlawhtlinnak cu cozah lubik le riantuantu tampi an ton hna tiah kan theih.

Cu lio i tonbiaruahnak an rak ngeihmi rian pehzulh in tutan ah Malaysia ah kal in tuanvo ngeitu upa hna ton biaruahnak ngeih than an timh hna hi a si. Australia ram tuanvo ngeitu upa hna ton biaruahnak an ngeih dih hna hnu ah Malaysia i Australia High Commission upa zong ton chih an timh hna hi a si.

2018 kum June thla lio ahkhan Australia ram in Senator Dean Smith nih Chinram le Chin ramkulh ah nuhrin covo a um lonak kong le nihin ni tiang Chin Ramkulh ah zalennak taktak a um lonak kong cu UNHCR zungpi, Geneva ah ca a kuat.

“UNHCR zung nih Chin ralzam pawl lam nan hunpiak nakhnga ding a biapi. A herh rih. An ram kir than ding ah thinphannak dirhmun a si rih tbk. amah pumpak hmuhmi kong le Chinram ah zalennak a um lonak kong a tialmi cu Senator Dean Smith nih Geneva ah a kuat” tiah Pu Renny Ceu Lian Mang nih cun a chimchap.

Australia hluttaw ah MP pakhat a simi Senator Dean Smith cu January 23 ah Hakha a phan i January 26 zan tiang a caam hnu January 27 ah Kalay ah a kir than. Chinram a caam chung ah Chief Minister Salai Lian Luai telh in Chinram cozah bu, hluttaw speaker Pu Zo Bawi, Hakha khuanu, khuapa, Chin zatlang bu, CNF, biaknak lei hruaitu upa, CCU riantuantu, Chin Media, siangngakchia bu, Hope Blood Donor Organization, ramkhel party le MP a tuan liomi palai pawl he ton biaruahnak an ngei kho.

Cun, Hakha sii-innpi, Hakhathar, Hakha Khuahlun a rawkralmi, HBA tualrawn velchum, Ralkap Tidil a rawkralmi, Khuacuanhnak tlang, Hlawhtling thlacamnak tlang, Solomon Van Hre inn, Thantlang CNF zung le Tikir Dam tibantuk hmun ah vehvatnak le tlonlennak a va ngei kho.

Senator Dean Smith hi Australia ram senator (hluttaw) lakah a hmasa bik Chinram a rak tlawngmi a si. Senator Dean Smith hi Australia ram ah senator (MP) 76 an um, cu lakah senator pakhat a si. Kawlram hi voili 4 a phan bal cang. Australia ram in cozah le senator vialte lakah 2018 January thla ahkhan a hmasa bik Chinram a rak tlawng. Hakha lawng hmanh si lo in Thantlang peng VP Henry Van Thio chuahkehnak Tikir khua tiang a va phan khomi Australia senator pakhat a si. Naypyidaw ah Vice President Henry Van Thio zong a va ton tiah kan theih.

Senator Dean Smith Laitlang a khuallam cu Australia ram ah khua a sami Australia Chin Federation Vice Chairman le Chin Charity in Chairman a tuan liomi Pu Renny Ceu Lian nih a rak zulh.

Senator Dean Smith cu Chinram a rak phak lio le Australia Day (National Day) aa ton caah Hakhathar nu upa hna he Van Hre Nunphung Hmuhsaknak inn ah Australia thantar thlirnak le Lai laam laampi nakin January 26 ah sunglawi ngai in caan an hmang. Australia Senator lakah a hmasa bik Chinram a phanmi lawng si lo in Australia cozah chung in Chinram ah a hmasa bik Australia Day a hmangmi senator pakhat zong a si.

Na ruahning rak langhter ve.. (Leave a comment)

%d bloggers like this: