CHRO nih 2020 Chin miphun nuhrin covo dirhmun report a chuah lai

TCP Hakha| 2020 December 17 – Chin ramkulh le chaklei Rakhine ram ah Chin miphun nih nuhrin covo buarnak an ton mi le kahdohnak ruang ah ton mi kong he pehtlai in Chin Human Rights Organization (CHRO) nih 2020 December 18, cawn ningani ah report an chuah lai tiah kan theih.

Hi kong he pehtlai in, CHRO in Salai Sang Hnin Lian nih, “Tutan kan chuah ding mi report nih a tlangpi in Chin miphun nuhrin covo dirhmun kong he pehtlai in a si. A luan cia mi thla 11 chung ah a cang mi hmaithlak in a si. Hihi a luan cia mi kum hnih thum chung ah pehtlai tein kan chuah lengmang mi kum dongh report zapi sin ah kan zamh mi a si. A luan cia kum 2018, 2019 le tutan 2020 tiah pehtlai tein kan chuah hi a si” tiah Chinland Post ah a chim.

Tutan CHRO report nih a bik in Paletwa le Chaklei Rakhine ah a cang mi kongkau, AA le Kawl Ralkap kahdodhnak ruang ah a cang mi nuhrin covo buarnak he pehtlai in cahmai 45 tluk in an tial tiah kan theih.


CHRO nih Chin miphun kongkau le nuhrin covo dirhmun he pehtlai tein report an chuahnak kong he pehtlai in, “2018 ah Chin miphun nih fak ngai in kan ton mi pakhat a um. Cucu, UNHCR nih Chin miphun cu Ralzam an si ti lo, Chin miphun umnak a him cang tiah an ruah caah Chin miphun ralzam vialte kirter ding in biakhiahnak an rak tuah. Cucu UNHCR lei nih an rak timi cu Chin miphun kongkau he pehtlai in thawngpang pakhat hmanh a um ti lo, a dai cang tiah an rak ti caah, CHRO nih UNHCR lehnak ca (submission) le ripawt (report) kan rak chuah cang. Cucu, vawlei cung ram kip, London, Geneva, Australia, India, Thailand, Bangkok tbk. ah kan rak kalpi. Cucaah, a luan cia mi kum thum chung hi kan si khawh tawk tein kan i zuam i, Chin miphun dirhmun kongkau hi vawleicung theih in report kan chuah lengmang nak hi a si” tiah Salai Sang Hnin Lian nih a chimh chap.

Vawleicung cozah pawl nih Ramkomh Kawlram kong policy an tuah tikah Chin miphun kong a tel chih khawhnak ah cherhchan ding le zohchunh ding a bawmtu a si lai tiah CHRO nih cun tumtahnak an ngei.

Tutan CHRO nih report a chuah ding mi kong le a report ah aa tel mi kong zapi sin chimfiannak (press conference) cu COVID-19 zawtnak ruang ah tlunkal le a bu in tonpumhnak a that lo caah, Online in an tuah lai i CHRO Facebook Page ah LIVE thlah le Zoom biaruahnak in an tuah lai tiah kan theih.#

Note: Hika ah ZOOM le FACEBOOK in tel khawh a si lai!

Na ruahning rak langhter ve.. (Leave a comment)

%d bloggers like this: