CHRO Nih Bangkok Ah Chin Ramkulh Nuhrin Covo Kong A Tialmi Report Cauk Chuahnak A Tuah Lai
Credit: Times of Chinland June 28, 2018
TCP-Online| 2018 September 26| Chin Human Rights Organization (CHRO) nih Chin ralzaam kong he pehtlai in UNHCR biachahmi lehnak ah Chin ramkulh nuhrin covo dirhmun kong report cauk an tialmi cu aralaimi September 27, 2018 ah Thailand ram Bangkok khualipi ah zapi sin theihternak a tuah lai tiah kan theih.
UNHCR nih a luancia June 13, 2018 ah Malaysia le India ah a ummi Chin ralzaam hna cu December 2019 kum tiang lawng ralzaam sinak in cohlan ding ah le mah a dih in cun Chin miphun cu UNHCR nih zohkhenhnak pek ti lo ding in bia a chah.
UNHCR nih Kawlram ah thlennak a um cang bantuk in Chin ramkulh cu Kawlram ah a daih biknak le kahdohnak a um ti lonak hmun a si. Cucaah Chin ralzaam cu December 2019 in kan zohkhenh ti hna lai lo tiah biacahnak a tuahmi hi a si.
UNHCR biacahnak cu Chin ralzaam nih siseh, ramleng ummi nih siseh faakpi in an doh pin ah CHRO nih Chin ramkulh ah nuhrin covo buarnak a tam tuk rih caah UNHCR nih a biachahnak let than ding in halnak a tuah.
CHRO nih Chin ramkulh ah cozah ralkap nih nuhrin covo a phunphun an buar rih nakkong, biaknak zalonnak a um rih lonak kong, Paletwa peng ah ral dohnak in Chin ralzaam tampi an umnak kong, Kawlram ah remdaihank tlamtlin a um rih lo caah Chin ralzaam kir awk an that rih lonak kong cu cahmai 35 in 2016 – 2018 kar Chinmi nih kan tonnmi nuhrin covo buarnak kong report a tial.
“Kawlram ah thlennak zeimawzat a um ko nain, tlangcungmi kan umnak hmun ah mithmuh kuttongh taktak in thlennak le thanchonak dik a um rih lo. Nihin tiang tlangcungmi cu kaltak mi le hnu chit takmi kan si peng rih ko,” tiah CHRO ah Director pakhat a simi Salai Sang Hnin Lian nih a chim.
A peh i, “UNCHR biachahnak hi sullam a ngei tuk lomi le Chinmi caah a dik lo tukmi a si. UNHCR nih an biachahmi zoh than ding hi kan duh. Aruang cu ralzaam pawl hi kir hna sehlaw himnak taktak le limhaang a ngeimi kirnak a si kho lai lo,” tiah a ti.
CHRO nih atu Chinmi nuhrin covo buar kan tonmi vawleicung theih in Thailand ram ah an tuah hlan ah Malaysia le India ram ah an kal i UNHCR nih an biachahmi zohthan ding in atu an tialmi report kong hi an va chimh cang hna.
ASEAN ah UNHCR zungpi cu Thailand ram Bangkok ah a um caah atu bantuk in CHRO nih Bangkok ah an report thanhnak an tuah timh hi a si. Hi tuahnak ah Media, nuhrin covo bu le UN lei riantuantu tampi an sawm hna tiah kan theih.+++
About The Author
