CHRO nih Chin Ramkulh ah COVID-19 Runvennak he pehtlai in bawmhnak pek cuahmah

Salai TKT & TCP Hakha| 2020 April 19 – Atu lio ah vawleipi huap in buaipi mi le ton cuahmahmi zawtnak COVID-19 ruang ah Chin Human Rights Organization (CHRO) nih a tuan lio mi rian chiah tak in Chin ramkulh peng 9 dihlak ah COVID-19 runvennak pehtlai in lakhruak cawlcanghnak (Emergency Response Activity) an tuah cuahmah tiah kan theih.

Vawlei cung ram 7 telmi, Livelihoods and Food Security Fund (LIFT) bawmhnak in CHRO nih a tuan chuah cuahmahmi Twe Let Project tangah atu bantuk in COVID-19 lakhruak cawlcanghnak hi an tuahmi a si tiah theih a si.

CHRO-CYO Matu nih Matupi peng ah Covid-19 Runvennak pek lio. Photo: CHRO Twe Let Project (Facebook)

Chin ramkulh peng 9 chungah Twe-Let hi tuan chuah a si bantuk in, hi COVID-19 zawtnak runvennak kong ah cawlcanghnak zong hi an tuan cuahmah.

CHRO Twe-Let Project ah Deputy Project Manager Sang Uk Lian nih, “atu CHRO nih, LIFT bawmhnak in kan tuahtuan cuahmahmi Twe-Let Project cu Thialkamnak le Riantuantu Covo lei kong a si. Nain, ruahlo pi in, vawileipi ah COVID-19 zawtnak kong a hun chuah i, a tlun tik ahhin kan riantuannak ah a kan bawmchantu a simi he hnatlaknak in, kan tuah cuahmahmi cu kaltak in COVID-19 kong ah tuahtuan ding in lungtlinnak kan ngei” tiah The Chinland Post ah a chim.

An cawlcanghnak pawl hna cu, COVID-19 kong ralrin ding le zulh ding tlang-au, COVID-19 kong cazual phawt, kut tawlnak (hand washing basin) serpiak, mask, kut tawlnak haang (hand sanitizer) le saiphiat phawt, le Radio le TV channel chungah COVID-19 kong chim rel hna an si.

“Kan nih kan tuahtuanmi bel hi hawi tuahmi he a dang deuh in kan i zuam. Twe-Let Project ah kan hmuitimh cu Thialkamnak le Rian kong he pehtlaimi a si bantuk in, atu COVID-19 kong kan hun cawlcangh zong ahhin, rian ruang ah a thialkam mi, tar, ngakchia, ralzaam (IDPs) tbk. deuh hi kan i hmaithlak hna. Cun, a hlei khun in peng 9 chung in kan tuanti hawile (partners) nih a herh, a bau an tining in kan i zuam hi a si. Kanmah CHRO Hakha zung nih duhning in kan kalpi lo” tiah a biapeh a chimchap.

CHRO nih Lam riantuantu hna sin ah Covid-19 Runvennak pek lio. Photo: CHRO Twe Let Project (Facebook)

Anmah le pengtlang nih an herh ning cio in a cunglei langhtermi bawmhchnnak hi tuah an si tiah kan theih.

“Hakha le Thantlang ahcun, lam rian tuanmi hna le IDPs pawl kha kut tawlnak haang (hand sanitizer), saiphiat sen le COVID-19 kong cazual (IEC materials) an phawt hna” tiah CHRO Twe Let Project ah Hakha le Thantlang tuanvo latu Project Officer Philip Nun UK Thang nih the Chinland Post ah a chim.

Paletwa peng in Tikir ah a rak zammi IDPs pawl sin ah a kalmi, CHRO he a tuantimi Thantlang Youth Association (TYA) in Thawng Bik Lian nih, “atu kan pekmi hna hi, an caah a thahnem tuk lai. Kan pek pah hna in a thuh dan, a hman ning zong kan chimh pah hna. Cun, mileng nan ngeih, siloah, leng nan chuah i nan lawi tik ah inn leng ah nan chiah lai i nan kut nan i tawl lai timi tiang kan chimh hna. Anmah zong an i lung hmuih tuk. An hmu bal theng rua lo dah ka ti” tiah a chim.

CHRO nih Tikir ah Paletwa peng in rak zammi Ralzam sin ah Covid-19 Runvennak pek lio. Photo: CHRO Twe Let Project (Facebook)

CHRO nih a ngeihmi riantuannak pali (4 components) dangdang lak ah atu Twe-Let Project hi Peace, Development and Democratization (PDD) tangah UK, European, Australia, Switzerland, US, Canada le Irish nih pekmi LIFT bawmhnak in a cawlcang i tuan chuahmi a si.

Kum 2017 April thawk in CHRO nih Hakha ah zung hun in cawlcangh hram an thawk i a tu ahcun, Chin ramkulh chung peng 9 ning in mino le nubu tbk. he bawm in rian an tuan. Chin ramkulh peng 9 ning in Zung zong an ngei cang tiah kan theih. #