CHRO nih Sami ah bawmhnak pek pah in hlathlainak an tuah

0

Salai Terah, Director, Field and Documentation Program, CHRO

TCP Hakha – Chin Human Rights Organization (CHRO) nih Sami IDPs umnak ah bawmhnak pek pah in May 12 in 17 2020 tiang nuhrin covo buarmi hlathlainak an tuah tiah kan theih.

Hi kong he pehtlai in, Chinland Post nih Sami ah bawmhchannak pek le hlathlainak tuah ah a kalmi CHRO riantuantu Salai Terah (Director, Field and Human Rights Documentation Program) pehtliahnak kan tuah tik ah tanglei bantuk in a chim:

“A tutan Sami ah kan miphun hawi Paletwa peng khuate in a rak zammi an konglam hlat duh ah kan kal hi a si. Asinain, Sami kan kal ah kanmah pum lawng silo in, anmah ralzam hna caah eidin tlawmpal te kan i ken. Kanmah CHRO phu kan kal lio ah tiah, Australia i WACCC, US in pumpak, a dangdang nih facang tun 250, Chiti, Kalape, Sii-ai, Ngakchia eidin tbk. an hlutmi cu kan pek pah hna.”

CHRO nih Sami ah ralzam pawl kong hlathlainak an kal ah Western Australia Chin Christian Church (WACCC), USA in Dongva khuami tlangval Hniang Len le a dangdang nih an hlutmi ting za leng man eidin, meh-hang, le sii-ai cu an pek hna tiah theih a si.

“Kan nih cu nuhrin covo kilveng mi phu kan si bantuk in, Watma khua oh-suh i khuate 7 tluk nih an tonmi le an tlik, an leknak kong kha felfai tein hlathlai duh ah kan kal cu a si. Vanlawng hmang in Bomb he an kah hna ruang ah a zammi an si. Cucu, kanmah pumpak in tonbiaruahnak ngeih hna i, anmah kong hi felfai tein tial i, ripawt chuah in UN lei tiang ah chimrel thluahmah ding timhlamhnak kan ngei i kan va kal hi a si. Cucu kan tuah zungzalmi zong a si ko” tiah Salai Terah nih a biapeh a chim.

Paletwa peng kahdohnak ruang ah ralzam hi 12,000 tluk an phan cang i a bik in hmun 9 ah an um. Paletwa khuapi, Sami khuapi le Miza ahhin a tambik an um tiah theih a si.

Sami khua ah a ummi hna ralzam kong he pehtlai in, Salai Terah nih, “atulio ahcun facang nana cu tampi an ngei ko. Mehhang lei eidin ah an chanbau. A thaw deuhmi Sa le Nga hi an eilonak a sau ko cang. Thazaang umnak vitamin ummi tirawl zong cu an hau ngaingai. A hlei in ngakchia hna caah a herh. Cun, ral ruang le COVID-19 ruang ah lehchuah a ngah lo i ramlak ah mehhang kawl zong a ngah lo, thing hlam zong a ngah lo. Cucaah, an har tuk hringhran. A hlei khun in, atu ah furpi kan phan cang lai, an umnak hmun pawl zoh ahhin, lungrethei a si ko. Ruah sur ahcun, innleng ah rawl an chuang kho ti lai lo. Atulio, a linh ah le inn chung ah an um kho lo. An har sa hringhrang ko” tiah The Chinland Post ah a chim.

A ke ah bom ci nih a khen mi nu upa. Photo: CHRO

Watma khua kiangkap in Sami khua ah ralzam in a rak phanmi hi khuate 9 in an si. A bik in, Kawl Ralkap nih vanlawng in March 14, 15 le 16 ah Meiksa-1, Meiksa -2, Meiksa-3 le Piang Tain tbk. khua pawl an kah ruang ah a tlimi an si. Nithum chung ah Laimi a tlawm bik 21 an rak thi i, 38 hliamhma fak an rak tuar. Cucu, CHRO nih an tonmi kong ah felfai tein biaruahnak an ngei hna tiah kan theih.

Chin Human Rights Organization (CHRO) cu 1995 thawk in rak dirh cangmi a si. Chin miphun nih nuhrin covo buar tonmi khomhsuat in vawleipi cozah le UN theih in a dirkamh in aupi mi phu a si. 2018 thawk in, UN Economic and Social Council (ECOSOC) nih CHRO cu UN ruahnak petu sinak a pek tiah theih a si.#

About The Author

Na ruahning rak langhter ve.. (Leave a comment)

%d bloggers like this: