CHRO nih UN ah Chin miphun nuhrin covo dirhmun report a pek than cang: Cozah nih thlen remh ding 10 an hal

0

TCP Hakha – 2020 Nov. 24| Chin miphun nuhrin covo bu (Chin Human Rights Organization-CHRO) nih kum 4 fai chung Chin miphun nih ton mi nuhrin covo kong he pehtlai in United Nations (UN) ah report a pek than cang tiah kan theih.
UN nih kum 4 voikhat tuah mi ram kip nuhrin covo dirhmun zohfelnak Universal Periodic Review (UPR) ah CHRO nih Chin miphun nih kum 4 chung ton mi Nuhrin Covo burnak kong he pehtlai in UN sin ah report tlamtling tein a pek. Hika ah mirangca in rel khawh a si Cu chung ah Ramkomh Kawlram cozah nih a ra laimi kum 4 chung ah thlen remh awk a herh mi thil phun 10 tluk zong an langhter chih.

Hi kong he pehtlai in, CHRO lutlai Salai Za Uk Ling (Deputy Executive Director) nih, “UN nih kum 4 dan voikhat vawlei cung ram zapi nuhrin covo kong ah zohfelnak (check) a tuah. Hihi 2006 hnu lawng in a thawk mi a si. Ramkomh Kawlram a voikhat nak an rak zohfel kum 2011 ah siseh, a voi hnihnak 2015 ah siseh, a tutan a voithumnak 2020 ah CHRO nih Chin miphun kong ah UN sin ah report pahnih kan chuahpi. 2020 July thla ah khan kan rak pek cang mi a si nain, a tulawng ah zapi rel khawh ding ah kan chiah. UN ah kan pek mi pakhat cu kanmah CHRO lawng nih Chin miphun kongkau te lawng kan tial mi a si. Cun, a dang pakhat cu tlangcung kokek miphun huap in CHRO nih kan hruai hna i a phu in UN ah report kan pek” tiah The Chinland Post ah a chim.

Tutan CHRO nih, UN ah report an pek mi chung ah Raltuknak ruang ah har tong mi hna kong, sualnak ngei lo mipi hna nih an temh inn nak kong, hrem an innak kong, hramhram in riantuanter nak kong telh in Chin ramkulh Paletwa ah kahdohnak ruang ah tonmi covo burnak a tampi a tel.

Cun, Chin miphun biaknak zalonnak kong he pehtlai zong an telh chih. Cu report chung ah, zalong tein biaknak inn lo ngeihnak nawl, zalong tein tonpumhnak nawl tbk. kan telh,” tiah Salai Za Uk Ling nih a chim chap.

Chin miphun ralzam kong le kokek miphun hna covo he pehtlai in, a dangdang tampi zong an telh mi chung in fimcawnnak kong ah fakpi in sersiam a herhnak an langhter.

CHRO nih mirangca in tial mi UN UPR Report chung ah, “Chin miphun hna he pehtlai mi kong lawng silo in, Ramkomh Kawlram cozah nih a tuah ding mi chung in, vawlei cung nuhrin covo lak ah biapi cahren (treaties) chung in ICCPR, CAT, ICERD, ICPPED tbk. minthun in hnatlaknak tuah ding ah a forhfial. Cun, kahdohnak kong ah cozah nih zulhphung siseh, Ralzam kong ah siseh, thanchonak riantuan tik ah felfai tein caihmainak a umnak ding kong zong cozah nih tuah ding mi ah an hal chih.”

1995 in rak dirhmi Chin Human Rights Organization (CHRO) cu 2018 thawk in vawlei cung cozah vialte fonhnak United Nations (UN) nih UN ruahnak petu sinak (ECOSOC special consultative status) a pek mi Chin miphun le Ramkomh Kawlram ah riantuan cuahmah mi phu pakhat a si.#

About The Author

Na ruahning rak langhter ve.. (Leave a comment)

%d bloggers like this: