CHRO Nih UN ECOSOC Consultative Status Sinak A Ngah

TCP Online: 2018 September 5 — Kum 1995 ah dirhmi Chin miphun nurhin covo kilvennak ah fakpi in rian a tuahmi bu Chin Human Rights Organization (CHRO) cu Economic and Social Council (ECOSOC) timi United Nations (UN) tang ah cozah silomi phu in ruahnak petu sinak le UN meeting poah ah tel khawhnak dirhmun sinak (consultative status) a hmuh tiah kan theih.

Hi kong he pehtlai in, CHRO riantuantu nih “kan soknak kum hnih fai tluk a rauh hnu ah a tu bantuk in an kan pek hi a si. ECOSOC consultative status kan ngahnak nihhin UN chung le UN he a pehtlaihmi tonpumhnak ah sawmtu le autu um lo in kanmah tein kal khawhnak nawl kan ngei cang lai. Cun, a hleikhun in UN chungtel simi ram pawl sin ah ruahnak peknak, cheuhnak le biaruahnak tbk… fawite in kan ngei kho cang lai” tiah The Chinland Post ah a chim.

“Council ah NGOs dangdang he siseh, chungtel ram he siseh, a dang ruahnak petu phu pawl he ruahnak cheuh tinak siseh, CHRO min in ruahnak peknak, duhmi chim khawhnak kan ngei cang lai tinak a si” tiah a chim chap.

Photo; Ukthang (Fb/Private)

A voikhatnak cozah a silomi phu Non-Governmental Organization (NGOs) nih UN meeting le biaceihnak ah telnak nawl an rak hmuh hi, 1946 ah a si.
Cucu, UN Charter (biakamnak cahren) Art. 71 hnatlaknak ning in cozah si lomi phu caah innka an hunnak a si.

“Tutan CHRO nih Consultative Status (ruahnak petu) sinak a hmuhmi nihin, UN Zungpi (Headquarters) New York ah siseh, Geneva le Vienna ah Bupi Tonpumhnak (General Assembly), Human Rights Council tonpumhnak le UN chungtel cozah phu (intergovernmental) biakhiahnak tuahnak hmun tbk… tonpumhnak ah tel khawhnak nawl zong a si” tiah CHRO riantuantu nih a chim.

ECOSOC Resolution biachahmi hnatlaknak 1996/31 ning in vawleicung ramkip in cozah si lomi phu (NGOs), zaanghleicawi in riantuanmi phu tbk… nih sok khawhmi a si.

Atu bantuk in UN ECOSOC Consultative Status sinak a hmumi hi Kawlram chung in chim lo, Asia hmanh ah phu tlawmte lawng an si tiah theih a si. Cu chung ah, America ah hrambunhmi Zomi Innkuan USA le CHRO hi a hmu hmasatu an si.+++

Na ruahning rak langhter ve.. (Leave a comment)

%d bloggers like this: