CHRO Riantuantu Australia Cozah Ton Ah An Kal Than Lai

TCP-Hakha | 2018 November 19 | Chin Human Rights Organization (CHRO) riantuantu upa Australia Senator Dean Smith sawmnak in Australia cozah he tonbiaruahnak ngei ding in December zarh khatnak ah an kal lai tiah kan theih.

Hi kong he pehtlai in, The Chinland Post nih CHRO riantuantu upa kan pehtlaih hna tikah hitin an chim.

“CHRO in riantuantu pahnih asiloah pathum kal ding in timhtuahnak kan ngei. Kan i timh cuahmah lio a si. Zarh dongh zong ah kanmah tonnak ngeita ding kan i tim fawn. A si khawh ahcun, pathum kal kho usihlaw tiah kan duh”.

Tutan, CHRO nih Australia cozah he ton dingmi hi a biapimi thil tampi lakah thil pahnih an i hmaithlak lai tiah theih a si.

Senator Dean Smith nih Chin State govt. in Chief Minister Salai Lian Luai le Hluttaw Speaker Pu Zo Bawi he tonnak a ngeih lio ~ Editor

“Atu tiang ah kan ton dingmi hna chung ahhin, Minister 3 le a dang Parliament Committee in upa cheukhat an i tel. A fiang cangmi hi ramleng pehtlaihnak (Minister for Foreign Affairs and Trade), ramchung uknak (Minister for Home Affairs), milurel tawlrelnak -‘Lah Wah Kah’ (Minister for Immigration) hi an si. Cun, Nuhrin covo lei tuanvo latu, ramleng pehtlaihnak tuanvo latu committee upa dangdang an i tel lai” tiah CHRO upa nih Chinland Post ah an chim.

“Australia rampi i, Prime Minister he zong ton khawhnak ngeih ding in Malaysia Chin Community nih Senator Dean Smith he tonnak an ngeih lio ah an hal” tiah theih a si.

CHRO tlawnkainak ding kong ah tawlreltu pakhat simi Pu Renny Ceu Lian Mang nih, “A bik in, Malaysia le India ah a taang rihmi Chin Ralzam hna kong ah chimrel ding a si. Cucu, CHRO nih naite Report chuahmi ‘Stable and Secure?‘ timi cherhchan in Australia cozah sin ah chimrel ding an i timh cu a si. Cun, Australia ramchung ah ummi nih tonmi chung in rammi sinak (citizenship) kong le chungkhar i auhnak 202 Visa kong tibantuk aa tel lai” tiah Chinland Post ah a chim.

Senator Dean Smith nih tlangtlak le tawlrelpiaknak in CHRO nih kan hnu kum 2017 September 12 ah Australia rampi cozah upa he tonnak an rak ngei cang. Cun, CHRO nih Senator Dean lila zong Laitlang tlung ding in an sawm i, 2018 January ah Chin ramkulh khualipi tiang a phan cangmi a si tiah theih a si.

Senator Dean Smith hi Australia ramchung Parliament ah Chinmi caah fakpi in a cawlcangmi a si lawng silo in, ramleng le hmundang ummi ca tiang ah cawlcangmi a si. UNHCR nih Chin miphun humhimnak pek tilo ding in biakhiahnak tuah lio ah, Geneva tiang a lungtlinlonak ca a kuatu zong a si.

Atu bantukin, CHRO nih ram kip ah kal in, UNHCR nih 2019 December 31 tiang lawng Chin miphun humhimnak pek ding ah biakhiahnak a tuahmi kong ah zohthannak, remhthannak le caansau deuh humhimnak pek ding ah nawlhalnak an ngei cuahmah lio zong a si.

Tutan timhtuahmi December 2018 ahhin, Australia in Chin community hruaitu upa cheukhat zong an i tel lai tiah theih a si+++

Na ruahning rak langhter ve.. (Leave a comment)

%d bloggers like this: