Chuncung Ah Ks. Sing 25 Man Hrawng Zuu An Tlaih I An Thlet Dih
City Hunter| 2018 July 23| Chuncung ah khuami nih ks. sing 25 man hrawng minung pali sin in zuu an tlaih i July 22 ah an tlaihmi hna zuu cu khuami lila nih khualeng ah an thletpiak dih hna. Zuu zuartu minung pali cu an zuarmi zuu an chuh hna pin ah tangka an liamter chap rih hna tiah kan theih.
Hi kong he pehtlai in The Chinland Post nih Chuncung khuabawi Pu Lai Hit pehtlaihnak kan tuah i atu bantuk in a chim.
“Chuncung khua hi nu le pa thlu lo in zuuding an hmang. Zuu nih a kan hrawh tuk caah khua ah ahohmanh nih zuu zuar lo ding in khuami nih tuanpi in khamh a si cang. Tukum March thla hrawng ahkhan phu khuachung ah zuu zuarmi kan auh hna i zuar ti lo ding in min kan thutter hna. Cu hnu ah khuapi meeting kan tuah i khuachung zuu zuarmi paoh tlaih le an zuu zuarmi chuh dih ding. Voikhat tlaih ah ks. 100,000 liamter le voithum tiang tlaih an si ahcun Hakha penguk zung le palek sakhaan ah report tuahding in biakhiahnak kan tuah. Cu biakhiahnak cu zul in July thla thawk khan khuachung ah zuu zuarmi chekhlatnak kan tuah.”
“July thla thawkka in chekhlatnak kan tuah i khua phung a buarmi minung pali kan tlaih hna. Kan tlaihmi hna pahnih hi Myanmar Rum an zuar, a dang pahnih hi OB (OP) an zuar. Myanmar Rum hi pha 40 le OB hi gallon 5 kan tlaih. Cu kan tlaihmi hna zuu vialte cu khuapi vantlang tawlrelnak in July 22 ah khualeng Rualtlei lungpang ah kan thleh dih. Khuapi nih biakhiahnak kan tuahmi bantuk in an pali ningte in minung pakhat ah ks. 100,000 (singkhat) cio dan kan tat hna. Anmah pali pin ah midang inn hnih a zuarmi an um rih tiah kan theih nain kan va chek taktak tikah an zuu an rak thuh manh rua, kan tlai kho hna lo. Khuachung ah zeibantuk zuu zuar paoh kan khamh. Asinain, Hakha ah anmah dinchomte tholkhat hnih an i phorhmi cu tlaih kan i tim hna lo. Hi zuu raldohnak rian cu khuabawi rian ka tuan chung paoh pehzulh in kan tuan rih ko lai” tiah Chuncung khuabawi Pu Lai Hit nihcun a biapeh ah a chimchih.
Tutan ah zuu zuar an tlaihmi hna chung in Myanmar Rum a zuartu hi Pu Thang Thum le Pi Tin Tin an si. Pu Thang Thum zuu hi pha 36 le Pi Tin Tin zuu hi pha 4 an tlaih. OB zuartu hi Pu Mang Lian, gallon 3 le Pu Thawng Tha Cung- gallon 2 an si tiah kan theih. OB hi cu tukum fur chuah lai hrawng lawng khan zuar aa thawkmi an si tiah kan theih.
Zuu an tlaihmi ciat-pha pakhat ah thol 12 a um i Chuncung ahcun tholkhat ah ks. 5000 hrawng an zuar. OB hi gallon 5 a si i tholkhat ah ks. 6000 hrawng in an zuar. Anmah Chuncung khua an zuarnak ret in tuak tikah an tlaihmi zuu le an thletmi zuu man hi ks. 2,500,000 (sing 25) hrawng a si tiah kan theih.
Photo Credit: Chin Cable Network
About The Author
