Chuncung Nih Thaizing Ah Lam Zawh An Timhmi An Zawh Than Rih Lai Lo
TCP-Hakha| 2018 Tho 28| Cozah nih khuami hnatlaknak tel lo in Zinghmuhtlang thluan National Park tuahdingmi le Lai tili an dilmi cung ah Chuncung khuami nih October 29 ni Hakha ah duhlonak lam zawh an timhmi cu cozah lei nih an onh rih hna lo caah lam an zawh kho rih lai lo tiah kan theih.
Hi kong he pehtlai in tuanvo ngeitu Chuncung khua upa Pu Thla Kio nih atu bantuk in The Chinland Post ah a chim.
“Tuanvo ngeitu cozah upa nih zung ah a kan auh. Atu lio hi Chinram ah Daw Aung San Suu Kyi a rak tlawn lio a si ruang ah siseh, Kanpetlet le Matupi ah caankarlak thimnak ding a si ruang ah lamzawh nan timhmi hi tuah rih hlah uh. Thimnak tuah dih – November 3 hnu ahkhin nan tuah te lai an kan ti. Cu ruang ah October 29 ah lam zawh rih lo in November 3 hnu tu ahkhin lam cu kan zawh than te lai. Thaizing (October 29) ah lam kan zawh than rih lai lo.”
Hi kong he pehtlai in Chuncung khuami Pastor nih, “Khuami hnatlaknak tel lo hramhram in Chuncung ram a simi Zinghmuh tlang cu cozah National Park tuah an timh ruang ah siseh, Zinghmuh tlang cung i kokek Lai tili le pangpar vialte hrawh dih in hramhram in tili an dilmi kan ngolpiak uh ti saduhthahnak nganpi he a ralaimi October 29, suimilam 10:30am in Hakha khuapi chung ah dohkalhnak lamzawh ding in cozah sin ah ca kan chiah cang” tiah The Chinland Post ah a chim.
Lamzawh ding in cozah sin ca an chiahmi ah an langhtermi cu; Hakha Khuathar sang, Thantlang lampial in Hakha lamtonnak (Suimilam tung umnak) tiang minung 350 hrawng nih lam zawh ding a si.
Chin ramkulh cozah nih Zinghmuh Tlang National Park tuah dingah a timhlamhmi hi Hakha peng, Falam peng, le Thlantlang peng pathum ram chungah a ummi a si. Hakha peng, Chuncung ram hi ekah 7756 aa tel, Falam peng hi ekah 6809 aa tel, Thlantlang peng hi ekah 5372 aa tel. Chuncung nih an dohkalhmi hi anmah an ramchung ekah 7756 hi kan kan dohkalhmi a si tiah kan theih.
Hi kong he pehtlai in Chin ramkulh cozah lei nih cun National Park cu ramkomh cozah nih tawlrelmi a si caah ramkomh cozah lam hmuhsakning he pehzulh in kan tawlrel ko lai ti ah an chim.
About The Author
