“Ciam dihlak in an khangh mi Thantlang khuachung ah thazang chap an duh. Cubantuk in thazang an chap khawh lawng ah khika lei hmunhma tlai kho ding in duhsah in hmunhma an samh lai” Salai Htet Ni
The Chinland Post | 2023 July 17 — Chin ramkulh, Hakha le Thantlang peng karlak Timit pawnghrawng ah SAC ralkap le CNA, CDF phufonh hna karlak ah July thla hramthawk in kahdohnak a fak ṭhan.
SAC ralkap pawl cu Thantlang khua an kuttang ah an tlaih khawh nakhnga Hakha khua in a luancia May thladongh lei thawk in kahdohnak an tuah i Hakha-Thantlang karlak, Timit pawnghrawng, Lungkhar tlang hna ah CNA, CDF he kahdohnak a fak.
Kahdohnak chung ah a sung tuk mi SAC ralkap pawl cu hnu an kir ṭhan tiah theih a si. Atulio Chin ramkulh, Hakha-Thantlang karlak telh in, kahdohnak dirhmun he pehtlai in CNF/CNA biachimnak nawl a ngeitu Salai Htet Ni Khonumthung Burmese nih biaruahnak a ngeih mi kha The Chinland Post nih aa tlak ning in Laica in kan rak leh chin mi a si.
Khonumthung Burmese : A hmasa bik ah, Hakha le Thantlang karlak kahdohnak dirhmun theih kan duh ko?
Salai Htet Ni : May thladongh in kahdohnak a tuah mi SAC ralkap pawl cu chikhat an i dinh hnu ah July 3 thawk in kahdohnak an thawk ṭhan. Caan karlak ah a herh ning in Hakha khuachung ah kahdohnak a um. A biapi in July 3 in July 8 tiang kahdohnak chung ah kanmah lei 6 an i hliam. Anmah lei 20 leng an i hliam ve.
Cubantuk in an i hliamnak hmunhma pawl ah ruak 6 cu pumpak in kan hmuh khawh. Anmah lei sizung a phan mi hi 42 an si tiah kan theih. Atu hi a hnu bik an phaknak hmunhma in an kir ṭhan cang. Asinain Hakha tiang an kir maw ti cu a fiang in kan thei lo. Anmah lei nih hriamngan an hman, Jet Fighter in voi 2/3 bom a rak thlak.
Khonumthung Burmese: Kahdohnak chung ah hriam pawl an lak khawh tiah kan theih. Thil sinning fiang deuh in na kan chim kho hnga maw?
Salai Htet Ni : Kahdohnak chung in hriam zuun 4, kuan 1,000 leng le an ruak pawl kan lak khawh.
Khonumthung Burmese : SAC ralkap thazang zeizah in dah kahdohnak an tuah?
Salai Htet Ni : A hramthawk ahcun phu 2 in an rak i ṭhen. Phukhat ah thazang 150 hrawng an um. Atu cu phu 2 aa ṭhen mi kha phu 1 ah an i fonh cang i Hakha-Thantlang, Timit lamcung ah lam an sial. Atu zong thazang 150 hrawng an um lai. An thazang a tlawm tuk cang ahcun Hakha in thazang an rak chap hna. Hakha-Thantlang, Timit kahdohnak caah Battalion panga a hman. Nain an thazang a tam tuk lo.
Khonumthung Burmese: Kahdohnak hi khoika hmunhma pawl ah dah a can?
Salai Htet Ni : A luancia May thladongh, June le July zarhkhatnak ahcun Lungkhar, Timit va tanglei tiah hmun 2 ah kahdohnak a cang. A voikhatnak kahdohnak hi cu Lungkhar ah kahdohnak an tuah. Atu cu an i fonh cang.
Khonumthung Burmese : SAC ralkap pawl zeiruang dah hnu an kir ṭhan?
Salai Htet Ni : An sungh tuk lo ahcun an kir dimg a si lo, an rak kai rih thluahmah lai. An sungh tuk caah an kir hi a si lai. A hlan ah hmainor in kahdohnak an tuah mi muisam kha atu cu umnak sakhaan sersiam ding an lo.
Khonumthung Burmese : SAC nih zeiruang dah Thantlang lei panh in atu le atu kahdohnak a tuah?
Salai Htet Ni : Kum fatin kahdohnak an tuah. Nikum atu bantuk caan zong ah kahdohnak an tuah i thlakhat leng kahdohnak a rau. Tukum zong cubantuk in kahdohnak an tuah ṭhan. A biapi cu ciam dihlak in an khangh mi Thantlang khuachung ah thazang chap an duh hi a si. Cubantuk in an thazang a ṭhawn lawng ah khika lei hmunhma tlai kho ding in hmunhma an samh lai tiah ka hmuh. Thantlang ah a tang mi SAC ralkap pawl sin ah thazang chap a duh caah kahdohnak a tuah hi a si tiah chim ka duh.
Khonumthung Burmese : Chin ramkulh kahdohnak dirhmun he pehtlai in adang zeitel chim na duh mi a um maw?
Salai Htet Ni : Atu (Hakha-Thantlang) leng ah Kalay lei in ralkap an rak kai. Kalay in Tedim peng luhnak Taingen zong ah kahdohnak a fak.
Fur caan Operation tiah an tuah khel kha an tharchuah ṭhan mi a si. Fur caan ah Chin, Karenni, Sagaing, Kachin hmunhma hna ah vanlei kahdohnak a tuah chin lai tiah kan theih. Cucaah kahdoh ningcang an rak i tuak cia mi kha a tak ah an tuah a si tiah kan hmuh.
