CIMC nih ralzaam caah camp 3 an sak cuahmah, TABC hruainak in ralzaam pawl tlawnnak an thok
Bungkhua IDP Camp, 2022 April 2 (Photo: Neely Laiuk)
The Chinland Post | 2022 April 7 – Chin Internally Displaced Management Committee (CIMC) nih ralzaam hna caah camps 3 kan sak cuahmah lio a si tiah April 7 ah a thanh.
Ralzaam a cheu cu cu camp chungah an um kho cang tiah a langhter fawn.
Cun, Thantlang Association of Baptist Churches (TABC) hruainak le tawlrelnak in, a voikhatnak IDPs & Refugee Care and Counselling (IRCC) khuallam cu an thawk tiah The Chinland Post nih April 4 ah kan rak langhter cang.
Hi tlawnkainak ah a telmi Rev. Neely Lai Uk nih, “IDPs & Refugee Care and Counselling (IRCC) program in ramchung ralzam hna tlawnnak program cu 2022 April 1 in, Bungkhua in kan thok. Ralzam hmunhma pical a si caah TABC riantuantu, ramchung pastor, hlasatu pin ah sibawi le nurse le riantuantu upa dangdang i tel in minung 30 tluk kan si,” tiah a pumpak Facebook cahmai ah a tial.
Bungkhua ah atutiang khua a sami hi, Ralzam inn 100 tluk sak a si cang. Inn 87 cu an umnak cang tiah theih a si.
“Khuami nih ralzaam an kan zohkhenh ning cu kan lung a hmui tuk tiah hmun um hawidawt hna ka in kan theih caah kan i lawm tuk” tiah Rev. Neely Lai Uk nih cun a tial chih fawn.
Cun, “An umnak inn bel salaeih in sak a si (hiti sak a herh caah a si) pin ah tipi kam a si i a lin ngaingai. Ti zong a har ngai i a thar in ti lak chap ding in ti pipe an zam cuahmah lio a si. Hi hmun um raalzam hawidawt hna he hmunkhat te ah zanriah dum tinak, Thawngtha i hrawm tinak le pumh a dih in bia i ruahnak zong sunglawi ngaingai in kan nei kho. Ralzam kan dihlak in thazaang thar kan hmu cio” tiah a chimchap.
A hlei in, tutan ah Dr. Dawt Hlei Zing (Bawi Hlei nu) le Sayama Mang Mang nih dam lo mi minung 103 an zohta hna. IRCC nih a lak tein mizaw hna cu sii pek an si tiah theih a si.
2022 April 2 thaithawh cu khuami nih sunglawi in an hman ti hnu ah, Riantuantu cheukhat hna cu thaithawh khim in Ruabuk lei ah khuallam an peh than tiah theih a si.
Camps chung a ummi ca zongah bawhnak pek khawh a si pengnak kong le camps saknak caah tiin zanghlei chuah in an kan bawmtu cung zongah lunglawmhnak kan ngei i Pathian tu nih thluachuah in pe ko hna seh tiah an langhter chih.
About The Author
