CNA a thawn lawngah Chin miphun a thawng lai: Pu Zing Cung
Pu Zing Cung
The Chinland Post| 2022 March 19 – Chin National Army (CNA) ah SAC ralkap pawl a dohtu Chinland Defense Force (CDF) pawl an i fonh a si ahcun nawlpeknak pakhat tangah dothlennak rang deuh in rianṭuan khawh a si lai i dothlennak hma a kal lai tiah Chinland Club biaruahnak ah Chin National Front (CNF) Chairman Pu Zing Cung nih a chim.
Pu Zing Cung nih “CDF bawmhchannak in a tulio cawlcanghnak a kal khawh bantuk in CDF pawl CNA an luh a si ahcun nawlpeknak pakhat tangah rianrang in tawlrel khawh a si lai i dothlennak hmual a ngei lai. Kan i tinhmi kan phan kho colh lai. Kahdohnak zong ṭha tein tuah khawh a si lai. Mah hi cu hopoah nih theihmi a si” tiah a chim.
Pu Zing Cung nih CNA cu Chin miphun hna aiawhtu ralkap a si i Chin miphun vialte himnak pek ding rian an ngeih lengah Chinland ram vialte kan kut chungah a phak khawhnak hnga rian a ngei fawn tiah a chim.
CNA cu miphun aiawhtu ralkap a si bantuk in kan ram hi Federal ramkomh pi ser khawh tikah a biapimi dirhmun ah an dir te lai.
“Federal ralkap kan ser tik zongah kawl miphun hna lawng nih ukmi ralkap a um rih a si ahcun a tu bantuk hramhram uknak lak pawl hna a um rih lai caah tlangcungmi hna caah raltuk cawnnak hi van ralkap, ti ralkap a ruan a hau. Cu bantuk ralkap dirh a si lai caah CNA zong a biapi tukmi dirhmun a phan te lai. Cucaah, CNA hi kan thazang ṭhawn a biapi tuk. CNA a ṭhawn ahcun, Chin miphun kan ṭhawng lai” tiah a chim.
A tulio caan cu Kawlram pumpi in hramhram uknak kan doh lio a si caah a tu bantuk caanṭha hi hmailei ah a um ti lai lo caah Chin miphun vialte nih dothlenbak a tha ṭhawn khawhnak hnga rianhlei ṭuan in bawmhchanh ding le CNA a ṭhawn khawhnak hnga zapi kut cungah aa hngat tiah March 7 ah tuahmi Chinland Club biaruahnak ah a chim.
About The Author
