CNA, CDFs Nih Thantlang Khua An Kulh Dih Cang, Ralkap An Thian Tiang Kahdohnak An Tuah Cuahmah
The Chinland Post | 2024 August 14 — Chin ramkulh, Thantlang khua cu CNA le CDFs phufonh pawl nih an kulh dih cang i a tang mi SAC ralkap pawl an thian tiang kahdohnak an tuah cuahmah lio a si tiah CNA chimphuannak nawl a ngeitu Salai Htet Ni nih a chim.
CNA le CDFs phufonh pawl nih Chin ramkulh, Thantlang khua an lak khawh nakhnga a luancia July 22 in kahdohnak an tuah cang tiah theih a si.
Atutiang ah Thantlang khuachung um SAC ralkap LIB 269 sakhaan zong an lak khawh cang bantuk in Hakha le Thantlang karlak ah a um mi SAC ralkap sakhaan pawl zong an lak khawh hna.
Thantlang khuachung um ralkap pawl cu tlakrawh inn le biakinn pawl ah an i thup hna i vanlawng zong nih kahdoh a bawmh hna leng ah hriam le eidin a thlak hna tiah theih a si.
“August 12 ahcun Hakha khua luhnak lei ah a um mi tlang pakhat kan lak. Hakha in Thantlang lei ah bawmhnak an pek khawh lo ding kha a biapi tuk. Vawlei lei cun bawmhnak a pe kho ti lo. Vanlawng in hriam le eidin an thlak hna. Thantlang khua kan kulh dih cang” tiah Salai Htet Ni nih nihin August 14 ah a chim.
Chinland Council hruai mi dothlennak phu pawl nih Thantlang khua ah SAC ralkap an thian dih tiang kahdohnak an tuah cuahmah lio a si tiah theih a si.
July 22 ah in August 14 tiang, Hakha-Thantlang karlak le Thantlang khuachung um SAC ralkap sakhaan 8 nak tlawm lo cu Chinland Cozah kuttang hriamtlai phu nih an lak cang.
About The Author
