CNA Ralkap Lt. Sui Uk Nih Thlatlinglo A Fapa Te Le A Nupi A Thihtak Hna

0

Salai Elvis| 2019 March 19| Chin National Army (CNA) ralkap Lieutenant Sui Uk (kum 35) nih a fapa zarkhat tluk te le a nupi cu March 18 zan suimilam 8:00 Hakha sii-inn ah pumsa dam lonak in a thihtak hna tiah kan theih.

“Lt. Sui Uk le a nupi Ngun Tha Dim cu Thantlang peng Farrawn khua in nau ngeihding in Thantlang sii-inn ah an ra. An nu cu Operation tuah in nau an ngeih nihnih thum ah a va pa Lt. Sui Uk cu amah pumpak dam lonak in Hakha sii-inn ah an kalpi i sii-inn ah a nunnak a liam. An pa thih thawngpang an theih in a nupi le a fapa te cu Thantlang sii-inn in an pa ruak cu an hmuhter hna hnu ah Thantlang lei ah an kirpi than colh hna. An nu nau ngeihnak Operation an tuahmi a thit an phawih in caan rau lo teah sii-inn in an chuak colh te ko lai” tiah chungkhat naihniam a si mi Farrawn khuabawi Pu Mang Bur nih TCP ah a chim.

Lt. Sui Uk cu Thantlang peng farrawn khuami Pu Khua Rem le Pi Iang Cin hna i an fanu Mai Ngun Tha Dim he 2017 kum December 18 ni ah a thiangmi thitumnak an rak tuah. 2019 March 12 ni ah Thantlang sii-inn ah nau ngei dingin an ra. Atu a thla tling rih lomi nau te lawng hi fa an ngeihmi a si.

Photo: Ngun Tha Dim

2016 kum lio in pumpak ngandam lo nak ruangah sii-ai aa thlopbul mi cu a dam lei panh ziah mah an ti ko nain 2019 March 18 zan suimilam 8:00 Hakha sii-inn ah a nunnak a liam hi a si.

Lt. Sui Uk fapa

Lt. Sui Uk cu a pa Pu Khua Hram@Khine Maung Swe le Pi Iang Chin hna i an fa pathumnak a si. 1982 kum Hakha peng Phaizawng khua ah a chuak i New Delhi ah B.Th a cawn lio 2011 April 14 ah ram le miphun caah tiin CNA ah a lut. KIA ah Cadet Training zong tlamtling tein a rak kai pin ah a rian a tlamtlinh i upat mi pasal tha pakhat zong a si.

Amah cu Kachin ram raltuknak a tlun in Tluangram CNA camp ah commander siseh, Tedim peng Zimte ah second Commander a tuan lio ah atu bantuk in ram le miphun ah a nun a pek hi a si! A ruak cu Kalay peng Kyarinn lei ah an tlun pi tiah kan theih.

About The Author

Na ruahning rak langhter ve.. (Leave a comment)

%d bloggers like this: