CNA Ralkap Nih Tlaihmi Bengali 4 Cu Kum 5 Chung Thongthlak Ding In Kalay Ah An Kuat Hna
Salai Elvis| 2018 February 23| February 6 ah CNA (Chin National Army) Camp in rak kuatmi Bengali minung pali cu Thantlang thonginn in Kalay thonginn ah February 21 ahkhan kum nga thongtla dingin an kuat cang hna tiah thawng kan theih.
Thantlang thonginn ah ni 8 tluk hren hnu ah biaceih bawi nih a tu bantuk in rammi sinak zeihmanh an ngeih lo caah kum nga chung thongthlak ding le rianhrang tuanding in bia a chah hi a si.
“Thantlang hi cu thonginn taktak a si lo caah Kalaymyo tu ah kan kuat hna nak a si. Rammi sinak zeihmanh an ngeih lo caah a tu bantuk in Lah-wah-kah upadi 13 (a) ning in tazacuai an si hnu ah biaceih bawi nih Kalay ah kum nga thong le rianhrang tuanding in bia a chah i February 21 ah Kalay ah kan kuat cang hna. Kum nga thong aa lim in anmah le ram cio ah an khirh than te hna lai ka zumh. Zeitindah cunglei nih bia an chah ning a si te lai hngalh a si rih lo” tiah Thantlang sakhan hmu Pu Thang Ci nih The Chinland Post ah a chim.
CNA ralkap nih Bengali minung pali cu February 6, Tio hlei an tan lio ah an tlaih hna. CNA ralkap nih February 13, suimilam 2:00 ah Thantlang penguk palek zung ah an rak ap hna. Penguk zung nih palek sakhaan ah an kan ap than. Dengteo in ahmuh tuah awk a that lo caah lah-wah-kah ah an ap than hna. Lah-wah-kah nih ramkulh sin ah atu hi zeitindah an tuah lai timi nawl an hal hna hnu ah atu bantuk in Kalay thonginn ah an kuatnak hna hi a si tiah kan theih.
Bengali minung pali an tlaihmi hna lakah pa pahnih cu Rakhine ramthen, Maungtaw peng in thil zuar le Nu pahnih cu Mizoram Aizawl in sin um veve an si. Hi hna pali cu kum 18 le 19 minung an si tiah Thantlang palek zung cazin ning in theih a si.
Atu bantuk in January 31, zinglei suimilam 1:30 tluk ah India ram, Mizoram lei in a rak lutmi Bengali minung 4 cu Chin ramkulh Tedim peng, Mualbem khua pawng palek nih an rak tlaih ve hna kan theih.
“Tedim peng, penguk bawi (auh-choh-zi-hmu) nih Falam peng palek zung thawng a kan thanh i kan kawl colh hna. Tu zingka suimilam 1:30 hrawng ah cycle carry a phortu minung pahnih telh in Bengali minung 4 kan tlaih hna” tiah Ye-oh Win Hlaing nihcun a chim.
About The Author
