CNA Rawtmi Le Training Pekmi Kong Thawngpang
Salai Aung | 2019 March 23| CNA nih February 16 ah Vanzangtlang pawng khuate Khuabawi minung 30 leng cu Tio camp ah meeting an tuahpi hna. Mah meeting an tuahpinak hna ah cun CNA lei nih khuate khuakhat ah minung 2 cio in Training kai dingin minung nan kan thlah piak lai tiah an ti hna. Khuabawi lei nih kan ti kho lai lo tiin kan leh hna tiah Tlangpi khuabawi Pu Tial Er nih a chim.
CNA nih an kalpi mi khua hna
CNA lei nih cun March 16 zaan ah an kalpi hna hi a si. Sopum khua in minung pakhat, Vanzang khua in minung pakhat, Farawn khua in minung pahnih, Lungding khua in minung pali, Tlangpi khua in minung pahnih an si. Tlanglo khua ah minung pahnih an tlaih ve hna i pakhat cu Training a rak kai bal cangmi a si ca ah an thlah than. Minung pakhat cu a zam manh tiah min langhter a duh lomi khuami pakhat nih a chim.
An kalpi mi hna khuami minung upa 38 hrawng nih CNA camp ah cun an kalpimi pawl thlah than dingin an va nawl hna tik ah Training kan pek ta hna lai i an dih in an kir than ko lai tiin an rak kan leh tiah Vanzang khuabawi Pu Sang Hup nih a chim.
Tlangpi, Farawn le Vanzang in an kalpi mi chungkhar biahal dingin an kal tikah Tlangpi khuabawi pa nih cun Tlangpi khua in an kalpi mi Bawi Ruat le a naupa cu an kir than cang caah a chungkhar sin ah kal a hau ti lo tiah an kan leh. Farawn khua in an kalpi mi chungkhar kan hal hna tikah an kalpi duh takmi si loin mi an rak i palh biatu a si. A hawipa kalpi dingah amah an sawmnak ah amahtu an kalpi bia si i a thaizing ah an rak thlah than colh ko tiah an chungkhar nih an chim.
Vanzang in an kalpi mi Val Hlei Cung cu a chungkhar ton dingah kan va kal tik ah a pa um lo a nu cu zei hmanh a hngal lo. Cun March 21 ah khan an rak thlah than ve cang tiah Vanzang khuabawi Pu Sang Hup nih a chim.
Hi kong he pehtlai in camp victoria ah a ummi CNA upa thil sining kan hal hna tikah, “Hi kong cu party chung ramkhel kong” a si caah kan in let kho hna lai lo. Kan pu le lawng nih chimnak nawl an ngei tiin an kan leh.
Hi kong he pehtlai in Col. Solomon Thangding nihcun, “Training kan pek bia hna a si. A cheu cu khuami nih an celh lomi hna, an chimhcawnpiak khawh lomi hna kha an va auh chihmi hna a si. Hramhram in ralkap tlakter le rawt chih a si lo” tiah media sin ah a chim.
Atu cu training an pekmi hna vialte cu zalongte in an kir than dih cang tiah kan theih.
CNA nih Sia an rak kahmi kongah Vanzang le Farawn khuami fiangternak
A luancia mi kum ah khan CNA nih CNA camp ah sia an rak kahmi cu hiti hin a rak si. CNA camp ah sia cu a va luh peng caah CNA lei nih Sia ngeitu sin ah Sia cu Camp ah luh terti lo dingin nawlnak voi 27 hrawng an rak tuah.
Cun Sia ngeitu nih an lak duh lo hnu ah CNA lei nih an lungdongh ah Sia cu an kah i a sa zong an rak pek ko hna tiah Vanzang khuami le Farawn khuami upa cheukhat nih an chim.
CNA lei nih hramhram in an kahmi si loin Sia ngeitu nih an lak duh ti lo hnu ah an lungdongh in an kah biatu khi a si tiah an chimchap.
About The Author
