CNF Mualphoh Duh le Tuah Hramhram ah Ka Ruat Cang_ CNF AGS Dr. Sui Khar

Salai Josephbawi| 2019 September 22| Kawlram President Zung Ramkhel le Humhimnak Vuanci nih September 16, 2019 ni Cakhenh 506 (158)/12/president office cakhenh in Chin National Front (CNF) tel in meeting tuahmi Arakan Army (AA) le Kachin Independent Army (KIA) hna nih Naypidaw hrawnghrang ah bomh an puah kho caah Ramkomh hmunhma (Naypidaw) biapi ngai in humhimnak tuanvo lak ding timi cakuat kongah CNF an itellonak kong le CNF mualphoh an duh ruang deuh ah a si lai tiah CNF upa sin in kan theih.

Hi Ramchung Humhimnak zung cakuat chungah August 20, 2019 9am-4pm tiang Thailand ram Mehangsong Pengkomh Thasawngyan peng, Mela@Bekaloh Refugee camp pawng Bohmu Kyaw Sakhan ah AA, KIA, CNF le KNU le theihlomi phu cheukhat an zapi minung (20) cu meeting an tuah I cu meeting ahcun September 16, 2019 a silo ah September 26 asilo ah October 16 a silo ah October 26 Naypidaw chung pakhatkhat ah bomh kan puah lai tiah bia an chahnak kong cu puah a ruang cu Kachin, Rakhine, Shan (chaklei) hna ah Ralkap le KIA, AA, TNLA, MNDAA ral an ituk cuahmahmi thluak mernak ding le a herhmi bom puahnak hmun le hma ni le caan hna an iceih tiah aa tel. Cu thawngpang cu Sohlohzii zung zong nih cathanh le ralrinnak ca a chuah ve.

“Hi kong hi tha tein ka zoh, pakhatnak ah Cacawn nihnih ni ah anmah National Reconciliation and Peace Center (NRPC) he tonding kan ngei i fiang tein kan halte hna lai kan ti. Biafiang deuh kan theihmi zoh in a herhmi thil kan tuahte lai timi kan ngei. Atutiang kan hei hmuhning ah Home Affair an theihmi hi President humhimnak zung sin ah ca an kuat hna. President zung lei nih an hmuhmi  thawng an zamhnak Sohlohzii (Ministry of Construction) nih an hun chuah thanmi kha zapi nih kan hmuhmi kha. Pakhatnak ah kha Thailand um refugee camp ah CNF meeting an kai ve an timi kha pakhat hmanh kan kai lo kan sifawn lo I kan khuaruah ahar ngai. Kha bantuk cakuat hi cu athlithup ralrinding (classified letter) a si awk zong a si. Pyithezii (Home) nih an chuahmi ah thlithup (hluh-woih/confidential) tiah aa tial i Sohlohzii ahkhan zeihmanh aa tial fawn lo. Mah hi CNF mualphoh an kan duh ruangah maw an tuah hramhram timi hi kan ruat ngaingai cang. Sohlohzii vuanci nih an cachuah hrim i an cakhenh kha a cunglei silo in a tanglei bik ah an tialmi zoh ahkhin mumal ngeilo in an chuah tikha a fiang. Pahnihnak ah hi bantuk a sitak a si ahcun anmah hmuhtonnak ah kan um peng kan ichon peng ko i zeitin dah a si tikha an kan chim ding a si ko. Tuahhrammi a si tiah ka ruah ko kei cu” tiah CNF AGS I Dr. Sui Khar nih The Chinland Post ah a chim.

CNF Kongtelmi Bomhpuahnak/ Sohlohzii

“Kiptuh NRPC ah kan itong lai i tha tein kan ihallai mah hnu ah thil hi zeidah kan tuah lai timi aa fiang bik lai. Atutiang pakhatnak ah  Ka chim duhbikmi cu hi bantuk thil a um ahcun zeidah a si tiah itheihter hmasa ding le pahnihnak ah an cachuah rengreng kha hmuhlo dingin an chuah ding a si. Zapi tlangau in social media ah tlang an zamhmi cu Cozah hrim chung ah hi bantuk Cozah thlithup (classified letter standard) phung ning in an chuah ding a si. an chuahlomi hi a poitukmi a si” tiah a biapeh ah a chim.

CNF cu Mah te khuakhan larelnak (Self-determination), Ramkomh Federal sernak le Democracy dik ngah khawhnak caah 1988 March 20 rak dirhmi a si. Thein Sein Cozah chan 2011 kum August thla ah kahdaih hnatlaknak tuah dingin sawm a si i 2012 in Cozah he Ramkulh le Ramkomh level ah Kahdaihhnatlaknak le Rampi huap kahngolh hnatlaknak (NCA) min a thumi Chin dothlennak a tuahmi hriamtlai phu a si.

Leave a Commnet

%d bloggers like this: