CNLD Party Nih Caantawi Caansau Tuanding Ah Zeidah Aa Hmuitinh?
The Chinland Post| 2019 August 26| Chin National League for Democracy (CNLD) party nih caantawi le caansau tuan ding ah zeidah an i tinhmi a si? Cu an i tinhmi kong he pehtlai in party Chairman Pu Zo Zam le Pu No Than Kap nih a tanglei bantuk in an chim.
“CNLD party nih kan tinhmi phunhnih a um; cucu caantawi tuandingmi le caansau tuanding ti an si. Caantawi tuanding ah 2020 ah thimnak hi a si. Chin ramkulh hluttaw hi Chin mizapi thinlung in kan laak lai i Chin ramkulh cozah bu le Chief Minister zong kan laak lai. Zalonnnak kan laak hlan ah siseh, kan laak hnu ah siseh Chinmi nih kan covo le nawlngaihnak kan sunghmi a tampi cang. Cu vialte kan miphun nih kan sunghmi kongkau ah kan laak than awk a herhmi tampi a um. Chin mizapi nih an duhmi le an herhmi kha kan tawlrel lai, an duhlomi le an hnatlak lomi cu kan dohpiak hna lai” tiah Pu Zo Zam nih a chim.
“CNLD party nih caansau tuanding ah aa hmuitinhmi cu; Miphun tlukrualnak, mahte in khuakhan lairelnak le federal ramkomh ser ding kongkau hi an si” tiah a chim chih.
“Chinram thanchonak a simi lam ser, hlei ser, innsak tibantuk hi cu phung bantuk in kalpi a si cang. Hihi cu zei bantuk cozah paoh nih a tuahtuan hrimhrim dingmi rian khi asi ko. Cucaah, Chin party nih teinak kan hmuh ahcun a biapi in kan tuahtuan dingmi cu an kan hlohpiakmi le kan sunghmi caholh, nunphung, vawlei hmun kong, ramri kong le roconak kong tibantuk hi biapi in kan i hmaithlak lai i kan tuanchuah lai. Kan sunghnak nawlngaihnak vialte kan laak than lai. Hi bantuk kongkau cu kanmah Chin miphun le party dah ti lo nih cun miphun dang le party dang nih cun an i hmaithlak in an kan tuahpiak hrimhrim lo ding a fiang ko. Cucaah, hi bantuk kongkau tuanchuahnak caah Chinram ah Chin party nih teinak hmuh le Kachin ram ah Kachin, Yakhine ram ah Yakhine party nih teinak kan hmuh hrimhrim a hau” tiah Pu No Than Kap nih a chim.
“Democracy hi Chin miphun asilole Tlangcung miphun caah a tlamtlingmi ukhruainak asi lo. A thami phung cu a si ko, nain mi tlawm/miphun hmemi caah a tha dih lo. Miphun pakhat kan dir khawhnak ding ahcun federal phunglam in kal a hau. Mahte in khuakhan lairel khawhnak kan ngeih lawng ah miphun tunmernak le fekte in dir khawhnak kan ngei kho lai. Cucaah, democracy le federal kawp in kal lawng ah sullam a ngei lai, man a ngei lai, hlawh a tling kho lai” tiah a biapeh ah a chimchih.
Hika ah Pu Zo Zam biachimnak video cheubang zoh chih khawh a si.
