CNLD Thantlang Peng EC siamremhnak le Candidate thimnak an tuah

CNLD Thantlang Peng, EC Meeting kai ah a phanmi hna cheukhat

Chin National League for Democracy (CNLD) Thantlang peng nih July 16 ah EC siamremhnak le Thantlang peng aiawh in 2020 thimnak ah aa cuhding Candidate thimnak an tuah tiah kan theih.

Atu bantuk in CNLD, Thantlang peng nih EC siamremnak an tuahmi cu Chairman Pu Lal Maung cung le Secretary Pu Tum Sang an phuah hna caah a si.

EC chungtel cu a um ciami minung chung le a lenglei in mithar he dihlak 53 meeting an kai kho. EC chungtel chapnak le siamremhnak an tuah. Ni 20 chung ah Candidate dihlak le EC tonnak kawh than in siamremh a herhmi siamremh ding ah hnatlaknak an ngei tiah kan theih.

CNLD Thantlang Peng caah thimmi hna cu;

Tlangtlatu (Na-Ya-Kah)

Pu Ral Tu,

Sayaci Ing Cem

Sayaci Hrang Chum

Pu Thawng Hnin

Pu Van Awi le

Pu Ni Kio

Chairman ah Pu Siang Cung Bik, Secretary ah Salai Fung Lian Thang le Assistance Secretary ah Salai M Cung thim chap a si. OC ah chapding mi, nubu, mino bu aiawh in in EC ah aa tel ding ceihmainak zong ni 20 chung ah fehternak ngeihding in hnatlaknak an ngei tiah thawng kan theih.

“CNLD Thantlang EC siamrem ding tonnak kan auhmi cu Covid-19 case in report kan ton caah thimnak comission zung le peng uk zung nih nawl an kan onh lo. Cucaah caan sau kan tuah kho lo. CEC lei in siseh Hakha CNLD upa zong an ra nain biachimnak le biaruahtinak kan ngei kho lo. Hmaizarh chung ah EC chungtel chapchunnak le hmunhma a lawnnak tete athar in siamremnak kan tuah than lai,” tiah min langhter a duh lotu EC chungtel pakhat nih The Chinland Post ah a chim.

CNLD Thantlang Peng in aa cuhding thimchung mi hna cu Pyithu Hluttaw in Salai Van Bawi Lian, Amyotha Hluttaw in Dr. Van Hmun Lian, Pyine Hluttaw No. 1 in Chinchin Pekthang le Pyine Hluttaw No. 2 in Saya Rung Kaw hna an si.

CNLD Thantlang peng nih Candidates chuahpi mi cu CEC nih zohfel in fehternak a ngeih te lai.

Na ruahning rak langhter ve.. (Leave a comment)

%d bloggers like this: