Col. Solomon: Mizapi Le CNF/A Kar Buainak Le Remlonak A Chuahtertu Hi Online Thawngpang Tialtu Pawl An Si
TCP- Yangon|2018 April 6| Thantlang Peng Dawn Khua mi hna cu CNA (Chin National Army) nih kan in velh hna lai, dai tein um ko u timi thawngpang hi a dik lo mi a si tiah Col. Solomon nih April 5 ah The Chinland Post sin ah a chim.
Dawn khua ah hmanphek a rak cawtu Vai pawl sinah ngunkhuai an lak hna kong cu Online ah thawngpang dik lo in; CNA nih khuami pawl velh ding an tlerh hna i anmah sinah ngunkhuai zong an lak chih tiah thawngpang dik lo in Online thawngpang tialtu pawl nih an tial.
“Thawngpang hi an tial tikah kap hnih in tial ding a si. A cu siloin, kap khat lei lawng in capo, lih bia a chim maw theih lo in tial cu a si kho deuh rih lo. Cu bantuk in an tial caah mizapi le CNF/A kar ah theihthiam lonak le iremlonak a chuahter khomi a si. Cun, atu Dawn khua cu CNF/A a kan daw taktaktu an si. Kan naupa ruak hmanh pei a fimtu an si cu” tiah Col. Solomon nih The Chinland Post sinah a chim.
CNA nih Dawn khua mi sinah ngunkhuai (tax) an lak timi kong hi a dik lo mi a si tiah a tang lei bantuk in a chim.
“CNF/A nih Dawn khua mi sinin ngunkhuai kan la hna lo. Hihi cu thawngpang dik lo hrim a si. Cun, hi bantuk in lih hrokhrol le anmah tangka hmuhnak men ah thawngpang a zamhtu hna nih CNF/A kong an tial hi cu an i ralrin ding bak a si. Miphun caah tiah a nunnak thap in rian a tuan mi hna kha, a si ning lo pi in mizapi he buainak chuahter timh hi cu a si awk hrim a si lo. Cucaah, an i ralrin a herh.”
About The Author
