Col. Solomon Thang Ding Europe Ah Ni 90 Timi Cauk Tlangzamhnak An Tuah; Ahodah Catialtu A Si?

City Hunter| 2018 April 23| Col. Solomon Thang Ding, Europe ah Ni 90 timi cauk cu April 22, chun hnu CACC zung, Hakha ah tlangzamhnak an tuah. Hi cauk a tialtu hi ahodah a si? 

Hi cauk tlangzamhnak ah Chin ramkulh hluttaw Speaker Pu Zo Bawi le CPTC in tuanvo ngeitu lutlai Rev. Tluang Ceu nih biatawi chimnak an ngeih veve. Hi cauk tlangzamhnak ah Hakha zatlang bukip le dawtu hawikom upa zapi 30 renglo an chuak kho.

Col. Solomon Thang Ding

‘Col. Solomon Thang Ding, Europe ah Ni 90 timi cauk cu CDES (Centre for Development and Ethnic Studies) nih uk 1000 in an chuahpiak. Cauk cu alak in phawtzamh an si. Hi cauk a duhmi paoh nih The Chinland Post zung, Hakha ah va i laak cio khawh a si. Hi cauk cu cahmai 320 renglo tluk aa telmi cauk tha ngai a si tiah kan theih.

Hi cauk chungum ah phundangte in aa telmi cu; ‘Lai Pasal Tha CNA Tlangval le Lasi Ngaknu Tuanbia’ timi (content) hi a si. Cun, ramkulh level in CNA/F le cozah i biakchawnhnak i hnatlaknak ngeihmi siseh, ramkomh level in CNA/F le cozah i biakchawnhnak i hnatlaknak ngeihmi zong tlingte in hmuh le rel khawh an si.

Chin ramkulh hluttaw speaker Pu Zo Bawi

Hi cauk tlangzamhnak he pehtlai in CNF in Col. Solomon Thang Ding nih atu bantuk in zapi sin ah a chim.

“Hi cauk rel khawh ding in a kan chuahpiaktu CDES cung ah kaa lawm tuk. Uk 1000 a kan chuahpiak. Hi cauk cu kan zuar lo, alak in phawtzamh an si dih ko lai. Hi cauk hi keimah pumpak kong tialmi cauk a si lo. Europe ah Ni 90 chung ka khualtlawnnak i mizapi he ton biaruahnak kan ngeih lio i biahalnak le bialehnak siseh, CNA/F cawlcangh riantuannak, hriam kan tlaih chung ah kan hmuhtonmi tibantuk pawl vialte aa tel dih. Keimah pumpak nih ka tialmi a si lo. Catialtu hi CNF Centre committee chungtel a simi le ka khualtlawnnak zong ah a ka zul pengmi upatmi kan pu Salai Tawk Ceu a si. A cung ah kaa lawm tuk hringhran.”

Catialtu: Salai Tawk Ceu

‘Col. Solomon Thang Ding Europe ah Ni 90’ timi cauk catialtu cu Salai Tawk Ceu a si. 1989 kum in CNF chung ah a rak lut. 2003 ah Denmark a phanh cangka in Denmark um Chinmi le CNF kan ram le miphun ca rian kan tuanti khawh nakhnga biatak tein a cawlcang colh. 2008 in 2014 tiang CNF Regional Committee in Denmark ah Chairman a rak tuan. 2009 in atu cauk a chuah tiang CNF Centre Committee member a si.

Hi catuk tlangzamhnak ah Chin ramkulh hluttaw Speaker Pu Zo Bawi nih, “Hi bantuk dothlennak cauk kan chuah khawhmi hi mi van tha taktak kan si. Chin miphun caah rotha cauk taktak a si. Cauk a tialtu, a chuahtu le a tawlreltu vialte upat ka pek dih hna, kaa lawm tuk” tiah zapi sin ah a chim.

Rev. Tluang Ceu

MP hlun a simi Pu Chan Pum zong nih, “Chin miphun dothlennak kong tuanbia hi an kan chimhmi kan theih theu. Asinain hmurka chimnak lawng si lo in atu ah cauk taktak in a hun chuah tikah Chin miphun caah cauk Rotha taktak a si. A chungum (content) pawl ka hun zoh tikah hi cauk ahhin CNA/F riantuan cawlcanghnak le Chin miphun dothlennak tuanbia a tling pah dih ko. Catialtu hrimhrim a thiam tuk. Cauk tlangtar, ‘Col. Solomon Thang Ding, Europe ah ni 90’ timi te hrimhrim hi ka uar kho tuk. Keimah pumpak hrimhrim zong in cauk tawlreltu le chuahtu cung ah ka lung aa lawm tuk” tiah The Chinland Post ah a chim.

Hi cauk tlangzamhnak tuah ni ah Rev. Tluang Ceu nih, Kawlram uktu U Khin Ngunt chan in ramri ah CNA/F le cozah an rak i chawnhbiaknak kong, President Thein Sein cozah chan ah CNA/F le cozah an i chawnhbiak khawhnak ding lamkaltu rian an tuannak kong, ramkulh le ramkomh dirhmun in kahngol hnatlaknak min an thut khawhnak kong le a donghnak bik ah NCA hnatlaknak min an thut i kumzabu 21 panglong conference an kainak thawng in Chin miphun le Chinram thanchonak innka a hun i hun deuhnak kong chimphuannak a ngeih. Cun, CNA/F ruang ah Chin miphun tampi ramtha kan phak khawhnak kong le mah sining hngal lomi ramleng um tampi nih CNA/F chiatnak le thatlonak kong an chim caan i a lungfahnak le a ngaihchiatnak kong zong a chimchih tiah theih a si.

CDES (Centre for Development and Ethnic Studies) hi Kawlram ah tlangcung miphun kongkau cauk tambik a chuahtu phu an si. Rangoon ah zung hun in riantuan cawlcanghnak an ngei. Cauk chuah lawng si lo in democracy le federal kong cawnpiaknak a pe lengmang tu phu zong an si. Dr. Lian Hmung Sakhong hi CDES ah Executive Director a rak tuan balmi a si, atu cu Board member lawng in a telpi cang hna.

Chin Miphun Dothlennak Tuanbia a simi le cauk rotha taktak hi Pu Victor Biak Lian tialmi le chuahmi “Ka Philh Kho Lo” timi le atu Salai Tawk Ceu tialmi “Col. Solomon Thang Ding, Europe ah Ni 90” timi cauk pahnih lawng hi a chuak rih tiah kan theih.

Na ruahning rak langhter ve.. (Leave a comment)

%d bloggers like this: