Covid-19 in a thi mi ah US ram tambik a si cang

Spain ram Covid-19 in a thimi Muslim hruak vuinak thlaan ah - VOA

|The Chinland Post – April 10, 2020| Vawleicung ram 200 tluk ah a karh mi Covid-19 zawtnak in a thi mi tambik nak le zawtnak a tam bik nak cu US (America) ram a si cang tiah theih a si.

World Health Organization (WHO) nih April 10, 2020 – Kawlram caan in zanlei sml 5: 30 ah a langhter mi ah Covid-19 in a thi bik mi ram cu US a si cang. Nizan tiang cu US nakin Italy le Spain hi a thi mi an tambik nak ram a si.

WHO nih a langhter ning ah US ram ah Covid-19 in a zawmi minung sing nga leng (517,697) an phan i, a thimi dihlak 18,487 an phan cang. A dam thanmi minung 25,670 an si tiah theih a si.

Covid-19 in US ram Washington DC ah khuasa mi Chin pa, Tedim mi (kum 38) zong nizan (April 9) ah a nunnak a liam tiah theih a si.

WHO nih a donghnak bik (April 10, zanlei sml 5: 45) tiang cazin a langhter mi ah vawlei huap in Covid-19 zawtnak a ngeimi dihlak 1,665,298 an si i a thi mi dihlak 98,598 an si cang. Vawleicung huap in a dam thanmi dihlak 354,942 an si cang.

Zawtnak a ngei tambik ram ah US in minung 517,697, Spain in 157,022, Italy in 143,626, Germany in 118,235 le France ram in 117,749 an si hna.

A thi tambik ram ah US in minung 18,487, Italy ram in 18,279, Spain ram in 15,843, France ram in 12,210 le UK ram in 7,978 an thi cang tiah theih a si.

US President Donald Trump nih cu Covid-19 zawtnak in America ram ah minung 100,000 in 240,000 karlak kan thi kho men tiah a chim.

 

Na ruahning rak langhter ve.. (Leave a comment)

%d bloggers like this: