Covid-19 in Kawlram mi 19,365 an thi
Chinland Post| 2022 February 28 – Ramkomh Kawlram chung ah Covid-19 pulrai a karh chin lengmang caah February 27 ah a thimi minung 5 an um chap caah Kawlram pumpi in a thimi minung 19,365 an si cang tiah Ralkap (SAC phu) i Ngandamnak tlaitu (Ministry of Health) nih February 27 ah a thanh.
February 26 zaan sml 8:00pm in February 27 zaan sml 8:00pm chungah cazin kumhmi mizaw a thar 1,959 an um tiah theih a si.
Cucaah, Ramkomh Kawlram pumpi in Covid-19 mizaw 586,000 leng an si.
February 25 le 26 kar zohfelnak in hmuhmi cu Shan ramkulh hi a tambik an si tiah theih a si.
Covid-19 mizaw 345 an um tiah Ministry of Health nih a hnu bik a thanhmi ah a langhter.
A pahnihnak mizaw an tam biknak hi Mandalay ramṭhen in 299 an si i Yangon ramṭhen hi 256 in a pathumnak mizaw tambiknak khua a si.
Yangon hi mizaw an tambik tawnnak a si, nain an zor thluahmah tinak a si tiah RFA thanh mi in theih a si.
Hramhram in uknak lak a si hnu in mizaw zeizah an um timi ṭha tein zohfel khawh a si ti lo caah Ralkap (SAC) nih thanhmi mithi cazin hi a taktak nakin a tlawm deuh kho men tiah zatlangbu pawl nih ruahdamhnak an ngei.#