Covid-19 ruangah November 8 Thimnak thawn ding in Party cheukhat nih an hal
Salai Bawi Lian Sang |TCP-Kalay| 2020 September 16 — Myanmar ram ah Covid-19 pulrai a kharh tuk caah ralkah (opposition) party USDP telh in party dang 23 nih a ralaimi November 8 thimnak a ni thawn ding in Rampi Thimnak Commission sin ah nawl an hal.
Ralkap he naihniammi phu USDP Party Center Chairman U Than Htey (ralkap hlun) nih “Vawlei cung pulrai tlun lio caan ah thimnak tuah ding hi thinphang a si ko” tiah AFP ah a chim.
“Cun, November 8 ah tuah dingmi thimnak cu a ni kan thawn piak ko uh tiah Rampi Thimnak Commission sin kan halmi nihin tiang an thawn hlei lo. Ralkah party lei in hi bantuk in a ni thawn ding kan ti duhnak cu zawtnak hrik a ngeimi an tam deuhdeuh i zawtnak a lang rih lo mi zong an um lai. Cozah lei nih runvennak kong le a ningcang an thanhmi zong an thei lo mi an um fawn caah tihnung ngai a si. Mi bupi in um le biaruah tinak zong tuah khawh a si lai lo” tiah USDP chairman nih cun a chim.
“Ram chung ah Covid-19 zawtnak hrik ngeimi zarh khat chungah a lethnih in an karh. A bik in Yangon ah Covid-19 zawtnak a ngeimi cu sizung ah mi an khat ngawt cang i cheukhat party nih cun thimnak hi December 27 ni ah i thawn sehlaw an duh cio” tiah a chim chih.
Nain, NLD cozah in biachimnak nawlngeitu Dr. Myo Ngunt nih cun “Coronavirus hrik hi nihin tiang kan kham kho rih ko rih caah thimnak ni can thawn ding cu Commission ah nawl hal a herh lo. Thimnak thlakhat hlei kan thawn zong ah zeih a thathnem hlei lai lo. Zawtnak a zual hma tuk lo ah cun thimnak tuah ding a si ko” tiah AP news ah a chim ve.
August thla lai in Rakhine ram in peng kip ah zawtnak pulrai a karh than caah 2020 September 16, zing 8:00AM tiang ah Myanmar ram ah zawtnak ngeimi 3636 an si. Cuchung in a thimi 39 an si. Cun, nikhat chung ah zawtnak hrik ngeimi 307 an si.#
Cc: VOA Burmese News, 2020 September 16
About The Author
