Covid -19 Zawtnak In India Ram President Hlun A Nunnak A Liam

Salai Bawi Lian Sang|TCP-Kalay| 2020 September 2| India ram President hlun Pranab Mukherjee kum(84) cu a zarh in caan sau nawn siizungah aa thlop hnu August 31, 2020 ah Covid-19 zawtnak in a nunnak a liam.

A thluak thikhal zawtnak in ruahlopi in a tlu i August 10 ah New Delhi khuapi India ralkap siizung ah Operation an tuah lio caan ah Coronavirus nih a thlak hi a si. A mah he naihniam in a ummi hna cu ralring te in um cio ding le Covid -19 zawtnak i check cio ding in President hlun Mukherjee nih a Twitter ah a tial. Covid-19 zawtnak in siizung ah ni 21 a um manh i chunglei rawkral nak in a nunnak a liam hi a si.

Mukherjee hi Kum 2012-2017 kum (5) chung India President a rak tuan. Cun India ramkhel rian ah kum (51) tiang a cawlcang mi a si hlei ah President a tuan hlan ah Chawva Tangka lei Minister, Ramdang pehtlainak le Ram hunhimnak lei Minister zong a rak tuan bal. Cun Ramkip chawva le tangka kawlnak bu IMF le World Bank chungtel member pakhat a rak si.

A tu ban tuk in India ram President hlun Pranab Mukherjee Covid-19 zawtnak in a thih cu rampi caah sungnak lianpi kan ton tiah President a tuanlio mi Ram Nath Kovind nih a Twitter ah ngaihchiatnak ca a tial. Cun amah he zuamcawhmi Bharatiy Janata Party Prime Minister Narendra Modi zong nih a twintter ah Mukherjee cu India ram thanchonak lam a sersiamtu a si tiah conglawmhnak ca a tial ve. Chirhchan: VOA Burmese News