Covid-19 Zawtnak Thlalau Lak Ah, Thawngpang Deu Tete

Editorial: 2020 March 24 — Atu bantuk in, vawleipi a hun hnihmi zawtnak a hun chuah tik ahhin, ngandamnak lei kap in ralrin ding a tam liangluang bantuk in, lungthin caah a tha lomi kan mit in kan hmuh i relmi thawngpang pawl hi a si. Ngandamnak kong ahcun, Sibawi le Ngandamnak Zung nih an kan chimh le cawnpiak ning in umthut ah a tha bik! A ruang cu hi bantuk caan lio ahhin, a tha mi le dikfel mi tampi lak ah, thawngpang diklo, thawngpang deu, a silomi phuahcop tawn chom in tialmi a tam khun tawn. Cucaah, kan relmi, kan hmuhmi, kan zohmi hi a dikfel taktakmi a si maw timi hi tuaktaan ngaingai a hau. Cu lo ahcun, kan hmuhmi le kan relmi ruang ah, lung nuamlonak a chuahter lawng silo in, thinphang thlalau in, thazaang dernak lei a chuahpi khawh.

A zawtnak kong ah kan i ralrin bantukin thawngpang kan hmuhmi le relmi kong ah biatakte in kan fimkhur a hau.

Kan hmuhmi le relmi poahpoah zumh dihlo ah a tha. Tuaktaan dih hnu le felfai tein check fel hnu ah cohlan ah a tha bik. Upa lungfim, thil sining thei ko mi tampi, Pastor te le zatlang hruaitu upa tiang in khuarang le fawi tuk in zum riangmang in mipi sin ah thanh chin kan hmang theo. A tak le deu then khawh hi a biapi tuk i ralring tein chimrel le tuahtuan ah a tha fawn!

Hi bantuk caan ahhin, a hlei hluat tuk in tialmi pawl an um theo. A si taktakmi he a lo ngai in tial, mipi lungthin chung ah taang dingmi phuah cop mi a tam tawn. Nai ah, tu zong lar ngaimi tahchunnak pakhat, Italy ram Prime Minister zong a tap, minung kan sinak in kan tei kho tilo, van lei lawng kan i bochan tiah a tah lio hmanthlak an tarmi hi thawngpang deu, le hmanthlak palhmi an hun thlah ciammang cu a poah taktak. Laimi zong nih kan izumh len. Italy ram ah mi tampi an thih cu a hman ko, nain mi lunglak sawhsawhnak ah, an tialmi le tarmi Prime Minister a tap timi le Hmanthlak an hmanmi kha a deu a si. A chim taktakmi tu cu atu bantuk kan tonmi thihlonak hi, Vawlei ralpi hnu ah a fak bik a si a ti.

Hmanthlak an langhtermi ah Brazil President Mr. Jair Bolsonaro a si i, a kong an tialmi ah Italy ram kong a si. Cucu, a hmanlo, a deu a sinak a si. Coronavirus kong ah kan thinphan ding a si lo tinak silo in, thil sining dikfel kan theihhngalh lo ruang ah thinphang tuk le lau tuk in kan um lo ding a biapitnak kan hun langter duh a si. Brazil ram zong ah, Coronavirus cu an tong cuahmah ve ko. Nain, a hleihluat tuk in tawn in tialmi ah ralrin a hau. Cu lo ahcun, lungthin nuamhlonak in zawtnak a chuahter sual hnga.

Italy Prime Minister nih Corona-virus kong a chim lio le a tap tiah hmanthlak tarmi Brazil President

Cucaah, Online Social Media tck. Facebook, Messenger, Viber tbk. in hawikom chungkhat i pehtlaihnak ah siaherhnak he thawng i thanhmi pawl tiang tha tein Fingril in Rilh dih hnu ah cohlan ding a biapi. Cun, siaherhnak he midang thawng ka hei thanh chin lai tiah a timmi zong nih, ka tialmi, ka thanh dingmi thawngpang hi a dikfelmi a si maw tihi felte in check, rilh dih ta ah a tha.

Atulio ah a biapi bikmi cu, kan pawngkam Sibawi, Cozah Ngandamnak Zung lei Riantuantu nih an chimrelmi felfai tein theih khawh i zuam i, an chim ning tein tuah khawh hi a biapi mi a si.

A karlak ah, bia chokfai sawhsawh le thawngpang dikfel lomi kan i ham in zumh sual lo ding a biapi tuk hringhran. Cu nih cun, a hleihluat tuk in lungretheihnak le thinphannak chung zong in a kan khamh theo lai timi ruahchnank he…..

Na ruahning rak langhter ve.. (Leave a comment)

%d bloggers like this: