COVID-2019 Zawtnak Rai Kilven Zohkhenh ding India Mizoram le Kawlram Ramri Palnak Kong India nih Nawlchuah

TCP-Hakha| 2020 March 11| Vawlei cung ramkip ah a karhmi Coronavirus (COVID-2019) zawtnak rai kham ding le kilvennak kong he pehtlai in India Mizoram le Kawlram Chin ramkulh ramri Rihkhawdar kalnak kong he pehtlai in 2020 March 10 ah India lei nih nawl an chuah tiah theih a si.

Cu nawl cathanh ahcun pali; India Kawlram tlawnkai tikah Zokhuathar-Rihkhawdar hlei dah tilo in Camphai pengkomh chungah luh lo ding, India-Kawlram kal khawhnak (Special permit) aa tlaihmi zong nih Zokhuathar-Rihkhawdar hlei lawngin kal ding le kal tik paoh ah chekhlatnak tuah ding, India lei kalpi dingin cohlan ciami thliri pawl (permissible items) pawl zong zawtnak chekhlat dih hnu lawngah kuat khawh a sinak le Kawlram lei in India lei kap luh paoh ah Mizoram Zokhuathar palek sin ah Min, umnak, phone number pawl pek hrimhrim ding ti pawl hna aa tel.
Kawlram-India ramhnih hlei palnak kong he pehtlai in nawl chuahnak hi India Mizoram Camphai pengkomh biaceih bawi S.L Neveen, IAS nih 2020 March 10 ah a chuah a si i a chuahni in thlahnih cu nawl a nung lai tiah theih a si.

Hi COVID-2019 cheknak hi Kawlram lei Rihkhawdar ngandamnak zung siibawi Dr. San Ma Oo le Ngandamnak lei riantuantu hna nitin cawlcanghnak an ngei ve tiah theih a si.

Hi kong he pehtlai in Vailamtlang CNF umnak Camp Victoria lam in Farkawn siseh, Saisichuak lam siseh India palek, Assam Riffle le YLA hna ramri an congh ve cang tiah ramri khuami nih The Chinland Post ah an chim.
IPRD Rihkhawdar + TCP

Na ruahning rak langhter ve.. (Leave a comment)

%d bloggers like this: