COVID-19 lakah Rakhine Kahdohnak nih Ralzam Thong tampi a karhter chin

0

Salai Bawi Lian Sang|TCP-Kalay| September 4, 2020 — Rakhine Ramkulh ah COVID-19 pulrai zawtnak an karh cuahmah lio ah Kawl Ralkap le Arakan Army (AA) karlak ah kahdohnak a tam chin caah ralzam a thong in an karh than tiah theih a si.

Tuzarh chung an i kahdohnak ruangah a thimi, hmapumi le tlaihkhihnak a tongmi an kharh than caah Kyauktaw peng chung khuami pawl an khua chuahtakmi an tamnak a si tiah Ko Zaw Zaw Tun nih a chimmi cu September 2 ah VOA nih a langhter.

“Tulio ah Kyauktaw peng kahnak ruang ah khuate (7) ah a um mi mitampi cu khuate he aa naihnak ah ralzam in an tli. An thutdirnak le eidin harsa ngai in an um. A tu COVID-19 pulrai ton lio can a si caah an harsa khun. Atu a zaammi minung 4,000 hrawng an si” tiah Ko Zaw Zaw Tun nih a chim.

Rakhine Chin IDP/7Days

“Nihin zingka in an tlik hi a si. Zeiruang ah an tli tiah cun Kawl Ralkap nih meithal ngan (Miakpi) le Meithal in khuachung an lut i an hun kah. Mizapi sin checkhlatnak an tuah ruangah khuami pawl nih an tih hna ruangah pawngkam khuate a dang ah an tlik nak a si. Ka ruahnak ah minung 5,000 hrawng an si men lai. Tazi le Shwepyithit an dih lak an si. Tuzarh ah an i kah ruangah Kyauktaw sizung ah aa thlopmi zong an um tiah” Kyauktaw khuami U Kyaw Hlah Myint nih a chim.

COVID-19 zawtnak Rakhine ram a karh lio can ah ralzam 200,000 hlei an um cang. Hi hnu ralzam an karh rih ko lai tiah Ko Zaw Zaw Tun nih a chim.

2020 September 3 tiang ah Vawleicung ah COVID-19 pulrai zawtnak ngeimi 26,062,946 in chung ah Ramkomh Kawlram (Myanmar) caan zan 8:00 PM MRTV thawngthanhnak ah Myanram ram COVID-19 zawtnak a ngei 1,111 lak ah Rakhine ram ah 496 le Yangon 464 an si tiah thawng kan theih.#

Cc: VOA Burmese News

About The Author

Na ruahning rak langhter ve.. (Leave a comment)

%d bloggers like this: