Cozah Nih Thantlang Khuanu Khuapa Hruaitu An Thimpiak Hna Ahcun CNDP Nih Doh An Timh
Salai Elvis| 2018 March 5| Thantlang khuanu/pa hruaitu i thimnak kongah mizapi duhnak si lo in cozah nih thimpiak chom a si ahcun Thantlang peng CNDP nih biatak tein doh an timh tiah thawng kan theih.
Biachokvak um pah caah a tubantuk in Thantlang khuachung khuanu/pa hruaitu cu cozah lei nih thimpiak an timh hna caah CNDP (Chin National Democratic Party) nih biatak tein doh an timh hi a si.
“Khuanu khuapa thimnak kongah cunglei nih a caan a za cang i thim u ti si ahcun zapi thim tein i thim ding. Cu i a dik lo ningin party, Committee nih maw, uknak nih maw pakhatkhat nih thimpiak (khanh) chom tibantuk a si sual ahcun cucu kan cohlang lai lo. Fakpi le a herh ning in ca zong kan tial lai, duh lonak zong kan langhter lai” tiah Thantlang peng CNDP haotu Pu Lal Mawng Cung nih The Chinland Post ah a chim.
Thantlang khuachung Sangthen pathum chungah khuanu/pa aa cuhmi sangkhat ah panga cio in chuahpi hnu ah cozah nawlpek nak in mizapi hna nih anmah lungtling tein thimnak rak tuahmi a si.
“Thantlang khuanu/pa thimnak cu a luancia kum miphun party kan tthawn lio sitik ah tam deuh pi an rak chuak. Sangkhat ah panga cio rak chuahpimi cu cozah nawlpeknak le mizapi duhning tein thimnak rak tuah a si. Cutik ah a tu lio khuanu/pa a tuanmi hna miphun party pawl hi a herhning in kan thlen nawn hna lai timi bia kan theih ngai. A si tak ko ahcun duhlonak langhter in lam zong kan zawh lai ti hi kan thinlung ah a um mi a si” tiah Pu Lal Maung Cung nih a chim.
Hi konghe pehtlai in “Thantlang khuanu/pa thimnak cu Chin ramkulh cozah nawlpeknak um hnu lawngah kan i thim lai” tiah khuanu/pa Chiarman Pu Thawng Hnin nih 2017 September 26 lio ah a chim mi cu a tuni tiang ah thla sarih a rau cang i Chin ramkulh cozah nih i thimnak nawl a pek rih hna lo caah a tuni tiang thimnak an tuah kho rih lo tiah theih a si.
Atu lio Thantlang khuanu/pa hruaitu cu Pu Thawng Hnin a si i miphun party chan lio ah mizapi duhning tein rak thim mi a si. Thantlang khuanu/pa tuan caan cu rikhiah a rak um lo caah Pu Thanwg Hnin cu tukum in a kum 5nak Thantlang khuanu/pa hruaitu a tuannak a si cang tiah theih a si.+++
About The Author
