Cozah riantuantu le khuami 500 leng Ralkap nih an hren hna: Paletwa facang eidin an har
TCP Hakha — Paletwa khuapi ah cozah nih meeting auhmi kai ding ah a phanmi khuate 60 leng in khuabawi, siangcachim, ngandamnak riantuantu le khuami 500 leng cu Paletwa khua in an khua cio ah kir kholo in Ralkap nih an hren hna caah an tang tiah Chin Human Rights Organization (CHRO) nih cathanh a chuah.
Khuabawi le Khuatekomh (ohsuh) cazi hi a cozah (Htwe-oh) nih meeting tuah ah auhmi hna a si i siangcachim, ngandamnak riantuantu le khuami cheukhat cu anmah le herhhai cio ah Paletwa khuapi an rak phan tiah theih a si.
“Hi minung 500 leng nih kan tuah dingmi kan rian herh cio cu July 1 ahkhan kan dih cio cang hna. Kan khua lei kir kan timh lio ah Kaladan Tiva kiang a cawngtu Ralkap nih nan kir kho lo tiah an kan kham caah kan i taap nak hi a si. Kan luh lei vial ah an kan kham lo, an kan luhter ko. Nain, kir tik ah nan kir kho lo an kan ti” tiah khuami pakhat nih a chimmi cherchan in CHRO nih cathanh an chuah cu a si.
Hika Paletwa ah chungkhat cingla a ngei lomi caah cun a har tuk. Riakbuk ah rian man pek awk zong kan ngei tilo. A sau deuh an kan hren ahcun, kan harsa hringhran ko lai. Kan theihhngalh sawhsawh sin ah kan tlun tik ah, inngeitu zong an hmai kan khap ti hna lo tiah Khuabawi pakhat nih a chim.
Khuabawi pakhat nih, “Ralkap sin ah zei ruang ah dah nan kan kir ter duh lo, nan kan kham tiah va hal hna. Nain, Kaladan Tiva kiang in a cawngtu Ralkap nih bia rak kan hal hlah u, tam tuk in holh hlah uh, a cunglei nih an kan fial ning in kan tuahmi a si” tiah ralkap nih an rak hronak cu a chim.
Tungkal ngam lo ding in, Kawl Ralkap nih cun a langhla in a lawng zong meithal kah in an tlerh hna caah hohmanh an kir ngam lo tiah theih a si.
Paletwa khua in a danglei pehtlaihnak an phih le khenkham caah eidin an harsa tiah Khumi Media Group (KMG) nih cun a thanh.
Paletwa khuapi le a pawngkam khuate khuasa mi, cozah riantuantu a silomi hna caah facang koko hmanh cawk a har cang. Facang tun khat ah 60,000 kyat in cawk a hau. Cozah riantuantu silo ahcun, riantuan khawh a si lo caah tangka kan hmu lo. Kan harsa ko tiah khuami nih KMG sin ah an chim.
A leng ah facang tun khat ah 60,000 kyat in an zuar lio ah, Paletwa ah umhmun khuarmi Kawl ralkap (no. 289) nih cun, 50,000 kyat in an zuarh hna tiah theih a si.
Atulio ah Paletwa peng ah Kawl Ralkap le AA kar ah kahdohnak a um lo nain, tlunkalnak lam a biapi hmanmi Kyawktaw-Paletwa tilam le tlanglam cu onh a si rih lo. Kum cheu tluk nawn a si cangmi hi tlunkal phihnak nih khuami harsatnak faktuk in a kan pek tiah ralzam bawmchantu rian ngei nih a chim.#
About The Author
