Cozah Sianginn Laica Chimh Rian Sok Khawh A Si Cang
Salai Cung Cung |2018 November 28| Hakha caholh le nunphungbu tawrelnak in cozah sianginn ah Laica chimhtu ding rian sok khawh a si cang. Soknak ding cu Chin Association for Christian Communication (CACC) zung ah le Thantlang Pu Ngun Hram, Pastor Dr. Duh Sang sin ah form cu December 3 in 15 tiang laak khawh a si lai tiah kan theih.
“Hakha peng le Thantlang peng ah cozah sianginn ah Laica chimtu ding in Hakha caholh le nunphungbu nih an tawlrel mi a si. Kanmah CACC nih TOT traning kan pek cang mi hna cozah sianginn ah rian a tuan cang ko nain cozah lei nih rian pek rih lo mi hna pawl caah sok khawh a si. Mah pawl hi an sok lai i minung zeizat dah rian hi an pek te hna lai ti cu kan hngal rih lo, asinain soknak nawl cu kan ngei. Hi an sokmi vialte hi Hakha le Thantlang cozah sianginn ah kan ap dih lai. Kanmah nih traning kan pek cang mi hna le cozah sianginn ah rian a rak tuancia mi hi papek deuh an si lai. Cun, adang zong a duhmi paoh nih sok khawh cu a si ko. December 3 in 15 kar lak ah hin tawlrel dih khawh kan i zuam lai. A dang zong tuan ding a um rih caah mah hlan ah hin a si khawh chung in rak sok cio dih hna seh ti kan duh” tiah tuanvo ngeitu Pastor Lai Cung nih The Chinland Post ah a chim.
Soknak caah a herhmi cu a tanglei hmanthlak ning hin a si.
Hi Laica chimtu ding in Hakha caholh le nunphungbu nih tawrel mi ah hin cozah sianginn lawng a si lai, pumpak sianginn caah a si lai lo. Nihlawh pawl hi cozah lei nih a dikthlir in chimh a si rih lo caah kan hngal rih lo. Hi rian cu tanghra awng le tangkua awng lawng nih sok khawh a si i tanghra awng mi ca le Degree a la cang mi hna caah cun hmailei rian kai khawh nak zong a um tiah kan theih.
About The Author
