CPC Nih Ks. Sing 100 Hrawng Dih In Hakha Ah Tho Paih Zuamnak An Tuah Lai
City Hunter| 2018 August 2| Chinland Paih Championship (CPC) nih ks. sing 100 hrawng dih in a ralaimi October 27, Chinram khualipi Hakha ah Tho Paih Zuamnak an tuah lai tiah thawng kan theih.
Hi paih zuamnak ah laksawng sermi le pek dingmi zat cu a tanglei bantuk in an si.
1. Zuamcawh (Singkhaw) champion – taisawm le ks. sing 25
2. Zuamcawh pahnihnak – trophy le ks. sing 3
3. Zatlang champion – taisawm le ks. sing 10
4. Tam bik teitu – trophy le ks. sing 3
5. Zuamcawh paih in minung 1 tei ah Ks. 25,000
6. Zatlang paih in minung 1 tei ah Ks. 5,000 laksawng pek an si lai tiah CPC tuanvo ngeitu sin in kan theih.
Tawlreltu phu hna nih, Paih laksawng caah ks. sing 50, hall hlannak, taisawm cawknak, security hlannak, bualtlaitu hlannak, angki sernak tibantuk le a dangdang ca he ks. sing 100 hrawng dih ding in an tuaktaan.
Zuamcawh ah aa pai dingmi cu minung 16 tiang lawng cohlan an si lai. CPC sin ah paih a cawngmi le min (credit) ngei cia lawnglawng papek an si lai. Cun, zatlang paih champion kong ah phundang te in zulhphung an ser. Cuti phung an sernak a ruang bik cu zatlang paih champion hi a zer deuhmi an co tawn, a thawngmi an co caan a tlawm. A thawng bakmi lawng nih champion co seh ti an duh caah a si tiah kan theih.
Phungthar an sermi cu; Zatlang paih caan a dih lio ah teinak a ngahtu pa nih minung 5 tal a tei rih lo ahcun champion sinak pek a si rih lai lo. Zatlang paih ah tambik a teitu pa he final an kai rih lai i teitu a simi kha zatlang paih champion pek a si lai. Caan a dih lio ah minung 5 cung a tei ko ahcun dengteo in zatlang paih champion pek a si fawn lai. Tambik teitu he final an kai than sual i tambik teitu nih a tengh ahcun tambik teitu pa kha tambik teitu a si hlei ah zatlang champion zong pek chih a si lai ti a si.
CPC cu Chinland News Chief Editor a simi Salai Lungthli Tum nih a dirhmi a si. Riantuantu 10 tluk an si. CPC nih a biapi in aa tinhmi le aa hmaithlakmi cu;
- Nunphung a si vemi Laih Paih thanchoter
- Paih thiam hna pawcawm khawhnak tiang laksawng serpiak
- Miphun caah a biapi tukmi “Rian” thar tampi ser hi an si tiah CPC dirhtu le a ngeitu a simi Salai Lungthli Tum sin in kan theih.
July 9 thawk in Hakha ah paih cawnnak zong an thawk. Paih a duh tuk nain a thiam rih lomi caah. Inn ngan takmi an hlan cang. Paih chimhtu caah tulio paih thiam bik Tluang Lian Thang zong thla hlawh pek in an sawm i amah nih paih a chimh hna. A chung ah gym tuahnak thilri tling ngai in an chiah chih.
Paih cawn a huammi nih alak (free) tein cawn khawh a si, gym zong tuah khawh a si. Gym tu cu deposit kyat 20,000 chiah a hau. Zarhkhat ah nithum kai a si i nikhat bau (absent) sual ahcun deposit chung in 5,000 zuh a si lai. Fel tein a kaimi cu a dih tikah deposit pek than dih a si lai. Paih hi thla 4 dan ah voikhat lengmang zuamnak tuah a si lai. A hmasa bik paih zuamnak cu atu bantuk in a ralaimi October 27 ah tuah an timh hi a si tiah kan theih. +++
About The Author
