CPC Zatlang Paih Ah Bawi Hlei Sang Nih Tangka Sing 10 In Champion A Co

0

Salai CungCung|2019 April 26| Avoi 2nak Chinland Paih Championship (CPC) paih cu April 25 in an thawk i zatlang paih ah Bawi Hlei Sang nih tangka Sing 10 le taisawm in champion a co. Hi CPC zatlang paih final a kai mi cu Bawi Hlei Sang le Biak Hnin Cung an si. Bawi Hlei Sang nih minung 10 a tei hna i Biak Hnin Cung nih minung 8 a tei hna tiah kan theih.

“Tu hi avoi khatnak zatlang Champion ka co hi a si. Tu bantuk zatlang champion ka hmuh caah kaa lawmtuk. Ka hawi le cung le CPC paih tawlreltu cung zong ah kaa lawm. Ni dang paih ah hin minung tambik hi pa 10 voikhat, cun minung 12 tiang ka rak tei bal hna. Kannih cu chungkhar unau pa 7 kan si i kei hi upabik ka si. Hmailei zong ah kaa pai peng rih ko lai, a duh mi paoh nih zuamcawh khawh a si” tiah CPC zatlang Champion Bawi Hlei Sang nih The Chinland Post ah a chim.

“Tu ni kan paih cu ka lungtling ngai ko. Tu ni hi zung kai ni zong a si caah minung hi ruah ning in cun an ra kho lo. Thaizing hi zing suimilam 8 in kan peh rih lai, paih zoh duh mi nih thazaang rak pek cio u” tiah CPC taunvo ngeitu pakhat nih The Chinland Post ah a chim.

CPC paih cu April 25 in 26 tiang tuah a si lai. Thaizing April 26 hi  Heavyweight le Middleweight tiin zuamcawh pawl an i paih lai. A caan hi zing suimilam 8 in an thawk lai. Hi CPC Paih ah hin Pengtlang pa 9 le zuamcawh Middleweight minug 32 le Heavyweight minung 18 an i pai lai. CPC paih ah pengtlang in a chuak kho mi hna cu, Zophei, Khualhrintlang, Mi-e, Senthang, Bual, Chuncung, Hnairlawn, Hakha Khuathar, Hakha Hhuahlun an si i pengtlang pakhat ah minung 5 lawng paih khawh a si lai tiah kan theih.

Avoi 2nak CPC paih laksawng pawl cu Heavyweight Champion Sing 30 le Middleweight Champion Sing 20 a si. Heavyweight paih ding cu pound 150, Middleweight paih ding cu pound 149 tang an si lai.

Zatlang minung pakhat tei ah tangka 5000, zuamcawh minung pakhat tei ah tangka 25000 a si lai. Paih zoh man ticket  pakhat ah tangka 5000 le VIP 25000 a si lai. Ticket cu zaran le VIP zapi caah 3000 in an chuah tiah kant theih.

About The Author

Na ruahning rak langhter ve.. (Leave a comment)

%d bloggers like this: