CPC Zuamcawh Paih Zuamnak Caah Minung 15 An Thim Khawh Cang Hna

0

Salai Cung Cung |2018 October 8| Hakha ah avoi 1nak Chinland Paih Championship (CPC) nih ks. Sing 100 dih in October 27 Khaikam Hall, Hakha ah Paih zuamnak an tuah lai. Zuamcawh paih zuamnak ah aa pai dingmi minung 16 lakah minung 15 an thim khawh cang hna tiah kan theih.

“Hi Chinland Paih Championship nih avoi 1nak kan tuah a si lai, hi tuahnak caah hin bawmhnak pek hi ramchung ramleng ahohmanh an um lo. Kanmah CPC tangka in zei paoh kan tawlrelmi a si. Hi Paih zuamnak tuahnak caah Hakha palek le khuabawi nih tuah khawhnak nawl a kan pek cang. Cun Chin ramkulh cozah sin zong ah ca kan pek cang, a rauhhlan ah kan in pek hna lai a kan ti” tiah CPC tuanvo ngeitu Salai Khua Aye nih The Chinland Post ah a chim.

CPC Nih Ks. Sing 100 Hrawng Dih In Hakha Ah Tho Paih Zuamnak An Tuah Lai

“Paih zuamnak cu CPC nih October 27, zinglei suimilam 8:00 in zanlei suimilam 2:00 tiang sunglawi ngai in Hakha Khuapi Khaikam Hall ah kan tuah lai i Chimram Paih thawng bik Chinland Champion kan ngei cang lai. Zuamcawh aa pai dingmi minung 16 cu October 15 hlan ah tling tein kan thim hna lai, atu hi minung 15 kan thim khawh cang hna. Paih a thawng bakmi le CPC ah Paih cawngmi hi papek an si. Chinland Champion ding ah tutiang zumh bik mi hna cu Thawng Tling (Hakha Khuathar), Tuan Ceu (Hniarlawn), Za Peng (Chungcung), Lian Thawng Hnin (Sakta), Sui Bawi Lian (Hriphi), Cung Van Thang (Zephai) an si. Minung 16 zuamcawh ah a thawng bik mi Champion hi Chinland Champion tiah auh a si lai. Laksawng ah Kyat sing 25 a si lai.

CPC nih laksawng kan serning cu sing 50 hrawng dih in a tanglei bantuk in a si” tiah a chimchih.
1. Zuamcawh (Singkhaw) champion – taisawm le ks. sing 25
2. Zuamcawh pahnihnak – trophy le ks. sing 3
3. Zatlang champion – taisawm le ks. sing 10
4. Tam bik teitu – trophy le ks. sing 3
5. Zuamcawh paih in minung 1 tei ah Ks. 25,000
6. Zatlang paih in minung 1 tei ah Ks. 5,000 laksawng pek an si lai tiah CPC tuanvo ngeitu sin in kan theih.

Paih hi ticket in zoh a si lai, ticket hi 1000 in chuah an timh. VIP (special) thutnak caah ticket 100 chiah le ticket pakhat ah ks. 20,000 in an zuar lai. A taangmi ticket 900 cu ticket pakhat ah ks. 5000 a si lai. Ticket hi midang zuarter lo in anmah committee nih an zuar lai. Ticket hi paih tuahnak hmun ah cawk in zoh khawh a si fawn lai tiah kan theih.

CPC paih zuamnak ah hin Zatlang le Club cawh in Zatlang Club tiah min an pek. Club in luh zong a ngah lai i pumpak in luh zong a ngah lai. Club in a lut ding tu tiang a fiangmi hna cu Chungcung, Hniarlawn, Hakha Khuathar le Zophei an si. Minung 7 cung tlin ah cun Club min i bunh in CPC ah min pek khawh a si. Khua, sang le pengtlang aiawh khomi papek a si lai. Club pakhat chungtel lakah paih thiam mi 2 tal i tel hrimhrim a hau, CPC ah paih cawn Chap a hau fawn.

Club 10 an si ah cun pumpak in lutmi phu khat a dang club pakhat bantuk in a um ve lai. Club pakhat hnu pakhat a changchang in paih bual ah luh a si lai. Tahchunhnak ah Khuathar Club le Hniarlawn Club an i paih hmasa, Khuathar nih a tei, Chuncung Club a rak lut, a tei rih, Zophei Club an lut i a tei ve. Senthang Club a lut, an tei rih, Pumpak a lutmi phu in min pe hmasa bik mi pa a lut lai, a dih in aa hel (round) than lai. Club pakhat cio nih hruaitu (Coach) ngeih a herh, Coach nih a lut ding a thim hna lai, nain pumpak alut mi cu hmasabik asiloah min pe hmasabik kha paih bual ah a lut hmasa lai.

Zatlang Champion cu Zatlang ah a lutmi lakah a thawng bik siseh ti kan duh, hi ruang ah phundang ngai in zulhphung kan ser. Zatlang caan a dih lio ah teinak a ngahmi pa nih minung pa 5 tal a tei rih lo ah cun Champion sinak pek a si rih lai lo. Tambik teitu pa he final an kai rih a hau. Tambik a teitu pa a tei lawngah Champion pek a si lai. Tam bik teitu pa nih a tei sual ah cun tambik teitu kha Zatlang Champion a si chih ko lai. Laimi tuahmi Zatlang Paih tamdeuh ah cun a thawng bikmi nih Champion an co tawn lo. Paih Thawng lem lomi- caan dih lai luh a hmangmi le a zer deuhmi nih Champion an co theu tawn. Tutan cu zulhphung kan ser cang caah a zermi nih ngah khawhnak lam aum ti lo tiah tuanvo ngeitu sin in kan theih.

CPC nih Paih zuamnak an tuahmi hi thlathum voikhat tuah peng an timh. CPC nih hmailei caah timh tuahnak an ngeihmi cu kan Lai miphun nih sunglawi tak in kan ngeihmi kan pipu chan in tu tiang Chin nunphung pakhat a si mi Paih hi Laimi nih hmailei pawcawmnak dirhmun tiang an i phakpi khawhnak ding an saduhthah a si.

CPC hi 2018 July in an thawk i Chairman cu Salai Lungthli Tum a si. Riantuantu zapi hi minung 5 an si.

About The Author

Na ruahning rak langhter ve.. (Leave a comment)

%d bloggers like this: