CYO A Thancho Khawhnak Ding Cun Ramleng Lei In Dirpi A Herh; Salai Bawi Uk Thang
Salai Bawi| 2018 June 10| Chinram ah Chin Youth Organization (CYO) mino bu a thancho khawhnak ding caah ramchung lawng si loin ramleng lei nih dirpi hi a biapi tuk tiah Central Chin Youth Organization (CCYO) technical Advisory a tuan liomi Salai Bawi Uk Thang nih a chim.
“Hmailei ramchung ramleng thawng deuh in kan i pehtlaih khawhnak ding caah hin phun nga in kan tuah a hau tiah ka hmuh. A pakhatnak ah Exchange program hi tam ngai in kan tuah a hau. Tahchunhnak ah; Internship, Summer courses hna i tuahpiak ding. Ramchung ummi hna caah exchange program a tha ngaimi sersiam piak. Cun, Online technology hman in ramchung ummi hna kha training tete tuahpiak. A pathumnak ah biaknak lei he pehtlai in mino bu he riantuan ti. Apalinak ah, Chinmi nih kan ihrawm khawh dihmi puai pawl ser, Chin National Day, Tho tbk. tete tuahpiak. A donghnak ah, ramchung lei a ummi mino bu caah Financial support pek hi a biapi hrim ko.”
Hi kong he pehtlai in USA lei in Lairam ah internship in CCU ah ca a chim cuahmah mi Salai Van Neih Bik nih hitin a chim ve.
“Kan Chin mino pakhat le pakhat kan i pehtlai khawhnak ding caah conference le Youth Development program timi mino thanchonnak hi tampi kan tuah a hau. A pakhatnak ah Chinram ah International Chin Mino tonpumnak hi tuah kho ah cun a tha bik hgna. Cu nih cun, kan i pehtlaihnak cu a fehter lai i a thawnter chin lawng si loin lam khat te ah Chinmi le Chinram thanchonak caah kan tuanti kho lai. Cun, Youth Development program timi hi voikhat tuah lawng in a za mi a si lo. Peh zulh tein kan tuah peng a hau,” tiah a chim.
2014 milu relnak ah Chinram ah mino hi 70% kan um i nu hi an tam bik tiah hmuh khawh a si. Chinram thanchonnak ding caah mah le khua, ram le pengtlang cio in bu tampi dirh a si i Chinmi le Chinram caah hmual ngei deuh in rian tuan khawh nakhgna ding caah tiin Central Chin Youth Organization (CCYO) cu bu 15 chungtel in a dirh a si.
June 5, CHRO zung ah, USA in Chin mino Lairam ah internship in a rak tlungmi le Hakha um Chin mino hna Chin Center for Peace and Reconciliation (CCPR) le Chin Human Rights Organization (CHRO) tawlrelnak in ton biaruahnak, atu lio Lai mino nih kan ton cuahmahmi thil kong ceihhmaitinak le hmuhtonmi i cheuhbauhnak ngeih lio ah atu bantuk in Salai Bawi Uk Thang le Salai Van Neih Bik nih zapi sin ah an chimphuan hi a si.
About The Author
