David Lai Nih Covid-19 Siizung Umnak Yangon Webaki Ah Volunteer Rian Bawmh Ah A Pum A Pe
Salai Bawi Lian Sang| 2020 October 1| Chin mi le Kawlram lakah hlasak minthang David Lai cu COVID-19 zohkhenhnak caah pumpek in rian bawmhnak a ngei hna tiah kan theih.
“Minung nunak cu a caan a tawi tuk.. na dawt dingmi hna sin ah dawtnak tling te in langhter.. na pawngkam caah na tuan khawh dingmi rian in dawtnak langhter” tiah September 27 ni a Facebook ah a langhter.
Matupi peng chuak David Lai cu a luancia caan ah Eimetsungya hlasak Season 2 zuamnak ah teinak a comi a si. A mah pumpak zongin “Kan duh ko na teiin” timi album a chuah cang.
Tu lio ah David Lai nih mahbantuk volunteer rian a tuannak cung ah a hawi kom hna le a fan pawl nih thlacam biak pah bu in thazang peknak an ngei cio.
September 29 ni ah a mah daw tu hna dirh mi “We Love David Lai” bu nih Siizung ah kal in tuanvo ngei tu saya/mah hna caah le mizaw mi bawmhnak an va pek mi zong theih a si. DVB TV news