Daw Aung San Suu Kyi Chinram A Tlawnnak Ding Khuallam Cu…?

Tawk Tling Thang | 2019 January 15| Myanmar rampi ruahnak petu Daw Aung San Suu Kyi cu tuzarh chung ah Chinram tlawn aa tim. Chinram a tlawnnak ding khuallam cu a tanglei bantuk in a si lai tiah Chinram cozah in tuanvo ngeitu upa pakhat sin in kan theih.

“Myanmar rampi ruahnak petu Daw Aung San Suu Kyi cu January 20 ah Kalay tiang vanlawng in a ra lai i Kalay hnu in Chinram cu helicopter a tlawng lai. Kalay in Tikir ah dengteo in a zuang lai i Tikir Dam le Electric mei hunnak a tuah lai. Cu dih in Rih asilole Thantlang ah a rak kir lai i Thantlang mizapi he ton biaruahnak an ngei lai. Cu khawh in Hakha ah a ra lai i January 20 zan cu Hakha ah a riak lai. January 21 zingka ah Hakha Khuacuanhnak (view point) hunnak a tuah lai. Cun, Hakha College le sianginn dangdang a zoh lai. Caan a ngeih si cun Hakha mizapi he ton biaruahnak a ngei lai i a ngeih lo cun, Chinram cozah bu he lawng in ton biaruahnak kan ngei te lai”.

Hakha in a zuang than lai i Falam khuapi chung ah lut ti lo in Surbung tlang vanlawng tual ah a tum lai i vanlawng tual a zohfel lai. Cu khawh cun in Tedim ah a zuang lai i mizapi he ton biaruahnak a ngei lai. Cu khawh in Tonzang peng, Tuikhingzang (Hakhalay) ah Daw Khin Kyi Foundation nih khuami inn 46, inn an sakpiakmi hna a zoh lai tiah Chin ramkulh cozah sin in TCP nih kan theih.

Rampi Ruahnak Petu Daw Aung San Suu Kyi hi amah lawng a ra lai lo. Myanmar ramkomh Vice President Henry Van Thio le ramkomh minister dang zong nih an rak zulh lai tiah min langhter a duh lomi Chinram cozah zung in tuanvo ngeitu pakhat sin in kan theih.

Daw Aung San Suu Kyi hi 2018 caankarlaknak thimnak tuah lai te ah Mindat le Kanpetlet zong ah a rak tlawng. Cu hlan zong ah Chinram, Hakha ah voihnih tluk a rak tlawng bal cang. Tutan hi Rampi Ruahnak Petu rian atlaih hnu in avoi 1nak bik Chin ramkulh khualipi Hakha a tlawn a si lai.

Na ruahning rak langhter ve.. (Leave a comment)

%d bloggers like this: